بۆ ئاگرێ نەورۆزێ هزار و 200 خەتیرە ل دهۆكێ دێ هێنە هەلكرن
زنار تۆڤی:
پەیڤدارێ رێڤەبەریا گشتی یا رەوشەنبیری و هونەری ل پارێزگەها دهۆكێ بۆ رۆژناما ئەڤرۆ دیار كر، پشتی فتارێ و نڤێژا عەیشا و تەراویحان، رێورەسمێن ئاگرێ نەورۆزێ ل دهۆكێ دێ هێنە گێڕان و خەتیرەیێن ئاگری بۆ سەرێ كێلیا شەدایێ و كێلیا فرعینی دێ هێنە برن و ئاگرێ نەورۆزێ دێ هێتە هەلكرن.
حەسەن فەتاح، پەیڤدارێ رێڤەبەریا گشتی یا رەوشەنبیری و هونەری گۆت: «ئەڤ سالە ب پشتەڤانیا د. عەلی تەتەر، پارێزگارێ دهۆكێ، مە ژی وەكو رێڤەبەریا گشتیا رەوشەنبیری و هونەری، ب هەڤكاری ل گەل سەرۆكاتیا باژێرڤانیا دهۆكێ، بەرهەڤی كرینە، كو خەتیرەیێن نەورۆزێ بهێنە هەلكرن، ب هەڤكاری ل گەل گرۆپەكێ لاوان، هزار و 200 خەتیر هاتینە بەرهەڤكرن و ل ئێڤاریا 20 ی ئادارێ، ئەو خەتیرە ل پاركا نەورۆز دێ هێنە هەلكرن».
گۆتژی: «ئەو گرۆپێ لاوان دێ بنە دو گرۆپ و دێ وان خەتیرەیان بەنە سەرێ كێلیا شەدایێ و كێلیا فرعینی، ل دەمژمێر 9ی شەڤ رێورەسمێن هەلكرنا ئاگری ل دهۆكێ دێ دەستپێكەن، خەلك ژی یێ داخوازكریە كو پشكداریێ د هەلكرنا ئاگرێ نەورۆزێ دا بكەن و د هەمان دەم دا ئاگر ل پاركا نەورۆز ژی دێ هێتە هەلكرن».
