بۆ جارا ئێكێ بەرهەمێ پیڤازێ ب سەركەفتیانە ل دهۆكێ هاتە عمباركرن
پشتی حوكمەتا هەرێما كوردستانێ ئاسانكاری بۆ دوروستكرنا عمبارێن ساركرنا بەرهەمێ خۆمالی كرین، رێژەیا دروستكرنا عمبارێن ساركرنێ بەر ب زێدەبوونێ نە، ل پارێزگەها دهۆكێ د نوكە دا 126 عمبارێن ساركەر هەنە، بۆ ئێكەم جارە ژی ل دەڤەرداریا شێخان ب سەركەفتیانە 475 تەنێن پیڤازان دهێنە عمباركرن.
دهێتە زانین پارێزگەها دهۆكێ یا ناڤدارە ب بەرهەمێ ناڤخوە و سالانە رێژەكا زۆر یا بەرهەمێ خۆمالی لێ دهێتە بەرهەمئینان، بەرهەمێ پیڤازان ژی ئێك ژ وان بەرهەمانە، كو خواستەكا زۆر ل سەر هەیە و د ئەڤ سالە دا ژی پتری 100 هزار تەنان هاتینە بەرهەمئینان.
