بۆ جارا ئێكێ مۆزەخانەیەك ل ناوچەداریا خانكێ هاتە ڤەكرن
سێمێل، دلڤین رەشید:
مۆزەخانا خانكێ ل ژێر چاڤدێریا دكتۆر نەوزاد عەبدوللا، بەرپرسێ لقێ ئێك یێ پارتی دیموكراتی كوردستان ل ناوچەداریا خانكێ هاتە ڤەكرن، ئەڤ مۆزەخانە پێك دهێت ژ كەلوپەلێن كلتۆری و كامیرەیێن كەڤن و پرتووكخانەك تێدا هاتینە دانان و بۆ جارا ئێكێ یە مۆزەخانەكا ب ڤی شێوازی ل دەڤەرێ دهێتە ڤەكرن.
بەرپرسێ مۆزەخانا خانكێ ئیڤان حەجی بۆ رۆژناما ئەڤرۆ دیاركر، بۆ جارا ئێكێ یە مۆزەخانەكا ب ڤی شێوەی ل ناوچەداریا خانكێ دهێتە ڤەكرن، كو تیدا كەلوپەلێن كلتۆری و كامیرەیێن كەڤن و پرتووكخانەك تێدا هاتینە دانان، ژ بۆ هندێ نفشێ نوو ئاشنایی كلتۆرێ باب و كالان ببیت و گۆت: «ل دەستپێكی ب تنێ هزرا مە ئەو بوو، ئەم ب تنێ ژ بۆ كامیرەیێن كەڤن ڤەكەین، بەلێ مە دیت دەڤەرا مە پێدڤی مۆزەخانەیەكا گشتی هەیە ل گورەی شیانێنن خۆ مە بزاڤ كر ئەم بەرفرەه بكەین».
گۆتژی: «داخوازێ ژ لایەنێ پەیوەندیدار دكەین، پشتەڤان بن ژ بۆ ڤی پڕۆژێ نوو، داكو ئەم بشێین د پاشەرۆژێ دا بەرفرەه بكەین و ببیتە ناسنامەیەك ژ بۆ كلتۆرێ ئێزدیان ب گشتی و دەڤەرا خانكێ ب تایبەتی».
