بۆ جارا ئێكێ گەشتیار ل ئاسمانی دێ دیمەنێن ئاكرێ یا كەڤن بینن
رەمەزان زەكەریا
بریار هاتیە دان ل ئاكرێ ل سێ جهێن جۆدا وێستگەهـ بۆ دانانا تلفریكێ بهێنە دانان و بۆ جارا ئێكێ گەشتیار ل ئەسمانی ڤە دیمەنێن ئاكرێ یا كەڤن ببینن و ل سەرێ تیشی بۆ سەرێ گری و بۆ سەرێ كەلێ، گەرەكێن ئاكرێ یا كەڤن دێ هێنە دیتن ب ساناهی. قائیمقامێ ئاكرێ ژی گۆت: دخوازین پرۆژەیێ تلفریكێ بدەینە هندەك بەلێندەران و بجهـ بینین، پلانێن كورت و درێژ مە هەنە، ئەڤ پلانە دێ زوو هێتە بجهئینان بۆ پتر جوانكرن و خزمەتكرنا دەڤەرا ئاكرێ.
رۆژنامەڤان سەلام مشیر بۆ ئەڤرۆ گۆت: جوگرافی و توبۆگرافیا ئاكرێ گەلەك ئەفرازی و نشێڤیان بخوڤە دگریت، ب تایبەت ژی هندەك جهـ ل ئاكرێ هەنە د بلند و بەرنیاسن، ئەو ژی گرێ تۆپا كو دكەڤیتە بەرامبەر كەلا ئاكرێ، هەروەسا كەلا ئاكرێ دكەڤیتە تەنشت كەلا كەڤن و بەرامبەر گۆرەپانا سەرێ گری، ئەگەر تلفریك ل سەر وان جها بهێنە دروستكرن هەم پێشڤەچوونەكا بەرچاڤ ژلایێ كەرتێ گەشتوزاریڤە دروست دبیت و هەم ژی دیمەن و جوانیەكا دیتر ددەتە ئاكرێ.
زێدەتر گۆت: د نوكەدا خەلك ب پیان قەستا سەرێ كەلێ و كەلا كوڤن و گرێ توپا دكەن، ب دروستكرنا تلفریكێ دێ بیتە پێنگاڤەكا باش و خۆش و ب ساناهی گەهشتن بۆ سەرێ چیایی، هەروەسا گرنگە دگەل چێكرنا تلفریكێ جهێن شوونواری و كەلتوریێن سەرێ كەلا ئاكرێ بهێنە نووژەنكرن، دا كو پتر ببیتە جهێ سەرنجا گەشتیاران.
ڤەهێل فەهمی، پەیڤدارێ گەشتوگوزارا ئاكرێ بۆ ئەڤرۆ گۆت: دانانا تلفریكێ ل ئاكرێ بجهكرنا بناغەیەكێ باشە بۆ كەرتێ گەشتوگوزارێ، دێ گەلەك مفایێ خۆ هەبیت بۆ پێشڤەبرنێ و سەردانیكەران و گەشتیاران و كاركرن دناڤ پرۆژەی دا، پرۆژەكێ مەزنە بۆ كەرتێ گەشتوگوزارێ و گەلەك باشی هەنە، ب تایبەت گەشتوگوزارێ ئەو جهێن هاتینە دیاركرن د باشن بۆ وێستگەهێن دانانا تلفریكێ، ئەڤ پرۆژە دێ رەوشا ئابووری باشتر كەت ل دەڤەرێ، بۆ راكێشانا گەشتیارا گرنگە ئەڤ پرۆژێ دانانا تلفریكێ ب زووترین دەم بهێتە دانان.
مامۆستا سەگڤان عەبدولخالق بۆ ئەڤرۆ گۆت: ئێك ژ سەكتەریێن كو پتریا وەلاتێن جیهانێ گرنگیێ دەنێ كەرتێ گەشتوگوزارێیە، كوردستان ئێكە ژ وان وەلاتێن ژینگەهەكا گەلەك گونجایی هەیە بۆ گەشتوگوزارێ، ب تایبەت ژی ئاكرێ ئێكە ژ وان جهێن گەلەك تایبەت بۆ راكێشانا گەشتیاران، ئاكرێ گەشتیارێ هەر چار وەرزێن سالێ هەیە، ب تایبەت ئەو بیرەوەریێن نەتەوەیی و سەر سال و نەورۆزێ، هژمارەكا مەزنا گەشتیارێن نافخۆیی و بیانی سەردانا ئاكرێ دكەن.
زێدەتر گۆت: سروشتێ ئاكرێ بوویە ئەگەر رێژا گەشتیاران سالانە پتر ببیت ئەوێن سەردانا ئاكرێ دكەن، بریارە تلفریكەك ل ئاكرێ بهێتە دانان دێ گەلەك گرنگ بیت و بیتە سەدەم گەشتیار پتر سەردانا ئاكرێ بكەن، ئاكرێ یا دەولەمەندە ب هەبوونا چەندین جهێن شوونواری و گەشتیاری و ب تایبەت بازارێ كەڤنێ ئاكرێ ب هەبوونا تلفریكەكێ دێ رەوشا ئابووریا دەڤەرێ گەلەك باشتر بیت و بازارێ كەڤنێ ڤەژیتەڤە، لەورا گەلەك گرنگە دانانا تلفریكێ ل سەرێ گری ل ئاكرێ.
د. دلاوەر بۆزۆ دەڤەردارێ ئاكرێ بۆ ئەڤرۆ گۆت: ل گۆر بەرنامەیێ كابینا نەهێ یا حوكمەتا هەرێما كوردستانێ ب سەرۆكاتیا مەسرور بارزانی و پشتەڤانیا پارێزگارێ دهۆك، پلان هەیە پرۆژێن گەشتاری زێدە بكەین، پرۆژێ خواستەكا زۆر ل سەر هەی د ڤی دەمی دا دروستكرنا تلفریكا ئاكرێیە.
ناڤهاتی گۆتژی: دخوازین پرۆژەیێ تلفریكێ بدەینە هندەك بەلێندەران و بجهـ بینین، پلانێن كورت و درێژ مە هەنە، ئەڤ پلانە دێ زوو هێتە بجهئینان بۆ پتر جوانكرن و خزمەتكرنا دەڤەرا ئاكرێ. وێستگەهێن تلفریكێ دێ ل سەرێ تیشی بۆ سەرێ گری و پاشی بۆ سەرێ كەلێ هێنە راكێشان، دخوازین پتر خزمەتا باژێری بكەین ب رێكا ڤان پرۆژان، گوژمەكێ باشێ پارەی دڤێت، لەوما دخوازم سەرمایەدارێن دەڤەرێ پتر خزمەتا باژێرێ خۆ بكەن.
