بۆ حه‌زا خوه كارێن ده‌ستی دكه‌ت
بارزان، ره‌مه‌زان زه‌كه‌ریا:
ماهر بیی، وه‌لاتیه‌كێ ده‌ست ره‌نگینه ل ده‌ڤه‌را بارزان، ددیداره‌كێ دا بۆ رۆژناما ئه‌ڤرۆ گۆت:بۆ ده‌مێ چه‌ندین سالانه من حه‌زا هه‌لگرتن و پاراستنا كه‌ره‌ستێن فولكۆری هه‌یه، كو پرانیا وان ئه‌ون یێن ل سه‌ر ده‌مێ باب و باپیران دهاتنه ب كارئینان من هه‌موو ل مال پاراستینه و نه هێلاینه ژ ناڤ بچن.
ناڤبری گۆت: كه‌ره‌ستَن به‌ری50 سالان من ل مال پاراستینه كو دایك و بابێن مه بۆ ژیانا رۆژانه ب كارئیناینه و گرنگه هه‌موو كه‌سه‌ك فولكۆری وه‌لاتێ خوه بپارێزیت و نه‌هێلیت ژ ناڤ بچیت ژبه‌ركو كه‌ڤناریا وه‌لاتان ب فولكۆری دیار دبیت، و ژبلی پاراستنا كه‌ره‌ستێن فولكۆری ل مال دا گه‌له‌ك گرنگیێ ب چێكرنا كارێن ده‌ستی دده‌م ل سه‌ر شێوازێ كه‌ڤن، ب دارا بیهۆكێ گه‌له‌ك جۆرێن كارێن ده‌ستی دكه‌م، وه‌ك چێكرنا سه‌ڤیا و كالكان و جهێ راكرنا نانی و فیقی و زه‌ره‌واتی كو ئه‌ڤه حه‌زا منه، هه‌روه‌سا سابونێ و گشما ژ كه‌زانا چێدكه‌م و هه‌موو رۆژێن خوه دناڤ سروشتی كارێن ده‌ستی دا ده‌رباز دكه‌م ب تنێ بۆ حه‌ز ڤان كارا دكه‌م.
