بۆ خوە پرسیار بكە
عەبدولرەحمان مەحموود
پرسیاركرن تشتەكێ زۆرێ نۆڕمالە بۆ هەركارەكێ مرۆڤ نەزانیت ئەنجام بدەت بۆ خوە پرسیاربكەت داكو ب ساناهی كارێن خوە بڕێڤە ببەت، یا من پتر مەرەم ژڤی بابەتی ڕێڤەبرنا مامەلێن هاولاتیانە ل فەرمانگەهێن میری، دیارە كەسەك ژمە نینە پێدڤی ب دام و دەزگایێن میری نەبیت بۆ بڕێڤەبرنا هەر كارەكێ مرۆڤی هەبیت، چونكی هەموو دەمان بۆ بڕێڤەبرنا هەر مامەلەكێ بیت مرۆڤ پێدڤی ب دام و دەزگایێن میرییە، گەلەك جاران دەمێ مرۆڤ وان كاروبارا بڕێڤە دبەت گەلەك پێڤە ماندی دبیت و سەرەڕای ماندیبوونێ ژی دەمێ مرۆڤ دچیتە فەرمانگەهەكێ بۆ بڕێڤەبرنا هەر جۆرە مامەلەكێ دبینین چەندین ژۆرێن ژمارەكری هەنە هەتا وان مامەلا بڕێڤە دبەین، لێ یا لڤێرە ئاریشە ئەوە دەمێ گەلەك جاران خودانێ مامەلێ دچیتە د ژۆرەكێ ڤە بۆ بڕێڤەبرنا كارێ خوە، پشتی مامەلە ل وێ ژۆرێ ب دووماهی دهێت پێدڤی ب ژۆرەكا دی دبیت بۆ بەردەوامی دانا بڕێڤەبرنا مامەلا خوە، بەلكو نوزانیت بچیتە كیژان ژۆرێ دێ بۆ خوە پسیاركەت داكو گیرۆ نەبیت ب ڕێڤەبرنا مامەلا خوەڤە، لێ گەلەك جاران فەرمانبەرێن وێ فەرمانگەهێ ب دروستی نوزانن كا بچنە كیژان ژۆرێ، دبیت ئێك بێژیتێ هەرە فلان ژۆرێ و خودانێ مامەلێ بچیت و وەسان دەرنەكەڤیت كو مامەلا وی ل وێ ژورێ بڕێڤە بچیت، ئەڤجا نەچاردبیت بچیتە دەف فەرمانبەرەكێ دی و پسیار ژێ بكەت، لێ یا سەیر ئەوە بەلكی ئەوژی نزانیت كا بچیتە كیژان ژۆر، نەچارە بێژیتێ هەرە بۆ خوە پسیاربكە، ئەڤ چەندە ژی دبیتە ئەگەرێ وێ یەكێ مامەلا مرۆڤی خاڤ بڕێڤە بچیت، گەلەك جاران ئاستەنگێن بڤی شێوەی ل هەمبەر مامەلێن هاولاتیان دروست دبن ژ ئەنجامێ نەبوونا پێزانینان لسەر جۆرێ مامەلێ و نەبوونا هەماهەنگیێ دناڤبەرا فەرمانبەرێن ئێك فەرمانگەهدا، ئەڤجا یافەرە ژلایێ ڕێڤەبەرێن هەر فەرمانگەهەكا حكومی ڤە فەرمانبەرێن خوە پڕ پێزانین بكەت لسەر چەوانیا بڕێڤەبرنا مامەلێن هاولاتیان و كارئاسانیان دڕێكا بڕێڤەبرنا مامەلاندا دروست بكەن هەتا كو ب ساناهی و ب دەمەكێ كێم مامەلە ب دوماهی بهێت.
