بۆ دیدارا نێڤدەولەتی تێنسا ل سەر مێزێ یا دهۆكێ گەهشتە كەرمەشانێ
قەیس وەیس:
تیما تێنسا ل سەر مێزییا یانەیا دهۆك گەهشتە باژێرێ كرمانشاه ژبۆ پشكدارێ د قارەمانییا نێڤدەولەتی ل سەر ئاستێ پێشكەفتییان، ئەوا بڕیارە ئەڤرۆ دەست ب هەڤڕكیێن وێ بهێنە كرن ب پشكداییا یانەیێن 25 وەلاتێن كێشوەرێ، ئاسیا، ئەفریقیا و ئۆرۆپا.
ل دۆر ڤێ قارەمانیێ عامر حەسەن زوبێر سەرۆك شاندێ تیما یانەیا دهۆكێ بۆ رۆژنامەیا ئەڤرۆ گۆت: ل سەر ئاستێ پێشكەفتییان تیما مە ب چار یاریزانان پشكداری قارەمانییا نێڤدەولەتی یا كرمانشاهـ ئەو ژی هەر ئێك ژ نزار فەرەج، نیبار ئەحمەد، زێبار رەجەب و عەمار محەمەد كو دێ نوونەراتییا یانەیا دهۆكێ و پارێزگەهێ د قارەمانیێ دا كەن و بڕیارە هژمارەكا زوور یا یانەیان ژ 25 وەلاتان پشكداربن، ژ كوردستانێ یانەیێن دهۆك دگەل دو یانەیێن هەولێرا پایتەخت و پارێزگەها سلێمانیێ.
ژلایەكێ دووڤە ناڤهاتی گۆت: پشكداری د قارەمانیێ دا وەكو پلانا كارگێریێ و تیمێ یە پێخەمەت باشترین شێوە مفایی ژێ وەربگرین هەرچەندە ئەركێ مە ب سانەهی نابیت ژبەر كو دێ قارەمانییەكا ب هێز بیت و هەڤڕكی بۆ ڕێزێن پێشیێ هەبن ب هەبوونا یانەیێن خودان شیان دناڤ قارەمانیێ دا، لێ بۆ مە گرنگ ئەوە ناڤێ دهۆكێ دناڤ لیستا قارەمانییا نێڤدەولەتی یا كرمانشاهـ بهێتە دیتن و یا دویێ ژی یاریزانێن مە زێدەتر ئاست و شیانێن خوە پێشئێخن ژلایێ جەستەیی و تەكتیكی ڤە كو بشێن بۆ قارەمانیێن داهاتی یێن كوردستانی و ئیراقی و دەرڤە باشتر بەرهەڤبن.
ل دووماهیێ عامر حەسەن دەستخوەشییا كارگێرییا یانەیێ كر ژبەر رۆلێ وان یێ بەرچاڤ ژبۆ پشتەڤانییا پرانییا یاریێن وەرزشی ژ وانا تێنسا ل سەر مێزێ و گۆت: پێنەڤێت ئەڤ پێنگاڤە دلخوەشكەرن بۆ یاریزانان و هەردەم كارگێرییا یانەیێ پشتەڤانێ یاریزان و یاریێن خوە بوویە، ب هیڤییا وێ یەكێ ئەم ب سەرفەرازی و ب مفایەكێ گەلەك باش ژ كرمانشاهـ ڤەگەڕین.
بۆ زانین قارەمانییا كرمنشاهـ یا نێڤدەولەتی سالانە ژلایێ فدراسیۆنا تێنسا ل سەر ئەردی یا ئیرانێ ب هەڤكاری دگەل فدراسیۆنا جیهانی دهێتە كرن، باشترین یاریزانێن جیهانێ ژ وەلاتێن چین، چاپان، ئیران، ئەلمانیا توركیا، مەغرب، مسرێ، كوریا باشۆر و سوید، یانەیا دهۆك وەكو نوونەرا پارێزگەهێ ئێكانە د ناڤ قارەمانیێ دا پشكدار بیت.
