بۆ دەمێ ٨ سالانە هندەك كەسان پرتووكێن مە نە زڤڕاندینە
زاخۆ، دلۆڤان هالۆ:
ڕێڤەبەرێ پەرتووكخانەیا گشتی ل ئیدارەیا سەربخوە یا زاخۆ دیاركر بۆ دەمێ ٨ سالانە هندەك كەسان چەندین پەرتووكێن مە یێن برین و هێشتا نە زڤڕاندینە.
فەرمان شوكر، ڕێڤەبەرێ پەرتووكخانەیا گشتی ل ئیدارەیا سەربخوە یا زاخۆ، بۆ ڕۆژناما ئەڤرۆ دیاركر كو ب مخابنی ڤە بۆ دەمێ ٨ سالانە نێزیكی هندەك كەسان 10 هەتا 15 پەرتووكێن ڕێڤەبەریا مە برینە كو ژێدەرێن باش و گرنگن و بەردەوام خواندەڤانان پێدڤی پێ هەیە ب تایبەت بۆ ڤەكۆلینێن خوە یێن دەرچوونێ، باجا خوە داینە مە و پەرتووك برینە، لێ هێشتا ئەو پەرتووكێن مە نە زڤڕاندینە.
ناڤهاتی ئاماژە ب وێ چەندێ ژی كر كو ئەو كەسە مامۆستا و كەسێن بەرنیاسن د جڤاكی دا، لەوما ئەم ڕێزێ لێ دگرین، و ئەڤە چەندین جاران مە پەیوەندی پێ كرینە، لێ هەر جار ب هێجەكێ دبێژن بلا ئەم دێ پەرتووكێن وە زڤڕینین و لێ هێشتا نە زڤڕاندینە.
گۆت ژی:»هندەك كەسێن دی ژی یێن هەین ئەڤە دوو سالە ناسناما خوە یا كەسایەتی داناینە دەف مە و هێشتا پەرتووكێن مە نە زڤڕاندینە، هیڤیدارم ئەڤ كەسە پێداچوونەكێ د خوە دا بكەن كا ئەرێ ئەڤ كارە دورستە یان نە، چونكی دەمێ ئەو پێدڤی وی ژێدەری بووین مە یێن داینێ، و پشتی وان هندەك كەسێن دی دێ پێدڤی ب وان ژێدەران بن».
زێدەتر ژی گۆت:»ئەم داخوازێ ژ هەر كەسەكێ دكەین یێ كو پەرتووكان ژ ڕێڤەبەریا مە دبەت پشتی دەمێ وێ یێ دەستنیشان كری پەرتووكێن مە بزڤرینیت ڤە، چونكی دێ هندەك كەسێن دی پێدڤی ب وان پەرتووكان بن بۆ ڤەكۆلینێن خوە یێن دەرچوونێ».
