بۆ دەمێ 43 سالانە ئەز سترانان دبێژم
زاخۆ، دلۆڤان هالۆ:
هونەرمەند حاجی زاخۆیی د دیدارەکێ دا بۆ ڕۆژناما ئەڤرۆ دیار کر کو هەر ل ژیێ 16 سالیێ ل قوناغا ناڤنجی ئەز چوومە سەر دەپێ شانوویێ و من ستران گۆتن، پاشان ل سالا 1981 شەڤەکێ ل بنگەهێ لاوان یا چەمێ دارێ ل ئیبراهیم خەلیل ب بەرهەڤبوونا هەر دوو هونەرمەندان ئەیاز یوسڤ و سەباح زاخۆیی من ستران گۆتن گەلەك کەیفا وان ب من هات و ئەیازی ئەز هەمبێز کرم.
ناڤهاتی ئاماژە ب وێ چەندێ ژی کر کو بابێ من و مامێ دەیکا من مەجیدێ عیسایی هونەرمەند بوون، و ئەز ژی ژ وان فێری ستران گۆتنێ بووم، ئەڤە بۆ دەمێ 43 سالانە ئەز سترانان دبێژم، ب بووچوونا من ستران گۆتن کارەکێ مەزن و ب زەحمەتە، لەوڕا هونەرمەند دڤێت هەموو جۆرێن سترانان بزانیت، ل دەستپێکێ من سترانێن مامۆستا سەمیر زاخۆیی د گۆتن وەکو سترانا ئەرێ دایکێ من نە دزانی عەسکەری ل پێشیا منە، ئەرێ دایکێ من نە دزانی غەریبی بەهرا منە.
گۆت ژی:»ل سالا 1986 مامۆستا سەمیر زاخۆیی ئێکەم ستران بۆ من ل بنگەهێ لاوان چێکر بناڤێ ژ ئەڤینا یارا خۆ ئەز تێرنابم، وی دەمی ستۆدیو ل زاخۆ کێم بوون و مە ل تەلەڤزیونان ستران تۆمار دکرن، ب تایبەت پشتی دامەزراندنا تەلەڤزیونا دایك سەتەلایتا کوردستان مە سترانێن خۆ ل وێرێ تۆمار دکرن».
زێدەتر ژی گۆت:»سترانێن هینگێ نەمربوون چونکی هونەرمەند گەلەك کێم بوون ژ زاخۆ هەتا سلێمانیێ نە دبوونە 10 هونەرمەند، و حنێر ئەوە هونەرمەند د ناڤ هزار هونەرمەندان دا دیار بکەت، و هندی من هێز و شیان هەبن دێ خزمەتا خەلکێ خۆ و وەلاتێ خۆ کەم ب تایبەت زاخۆکا دەلال و پارێزگەها دهۆکێ و پارتی دیموکراتی کوردستان».
