بۆ… زارۆك و گەنجێن خوە ببێژن
سەدیق سنداڤی
هەر د دیڕۆكێ دا، گەلێ كورد كارەساتێن دلتەزین یێن دیتین. دوژمنێن كوردان، هەردەما ب هێزكەفتین و پێدڤی ب كوردان نەمایی، هەمی سنوورێن مرۆڤایەتییێ و دینداریێ یێن بەزاندین و كوشتار یێن ل گەلێ كورد راكرین. كوردستان یا داگیڕكری خێروبێرین وێ یێن بۆ خوە برین، بەس ڕۆندك و برینێن كوور بۆ ڤی مللەتێ خوەڕاگر یێن هێلاندین. لەوماژی پێدڤیە گەلێ كوردستانێ، چ جاران ب گۆتنێن تەیسۆك و لهەڤهاتنان و بەیانان دل خوەش نەبت و نەئێتە خاپاندن. چونكو پشتی ڤان هەمیان، كوشتار ل دویڤ كوشتارێ ل كوردان یێن هاتنە راكرن.
ئەڤە ژی یێن بوونە برینێن كوور د دلێ هەر كوردەكێ دا، ب بیرئانینا ڤان كوشتاران، واتەیكا مەزنە ژبۆ كوردستانیان و نامەیەكا ب هێزە ژبۆ دۆست و دوژمنان. كو بەلێ ب كوشتارا و داگیركرنێ ژ ناڤ ناچین و دێ هەر مینین خوەڕاگر و خوە بۆ هەر خوینمێژەكێ ناچەمینن. ژبەر هندێ ژی پێدڤیە سەرهاتێن دلتەزین یێن ب سەرێ گەلێ كورد هاتنە ژ ئالێن داگیڕكەرێن كوردستانێ ڤە، ئەم بۆ زارۆكێن خوە بێژن و دایباب فەرە زارۆكێن خوە لسەر حەزژێكرن و ژبیرنەكرنا كارەساتان پەروردە بكن. ب بەرفرەهی فلمێن دێكیۆمێنتاری و زنجیرەیێن تەلەڤزیۆنی و فلمێن سینەمای ل كەنالێن راگەهاندنێ بێنە وەشاندن، پرتووك بهێنە نڤێسین و تایبەت د پەرتووكێن پەروردێ دا ئەڤ روودان بهێنە ئازراندن. دا زارۆك و گەنجێن كوردان تێبگەهن كو ئەڤ دەستكەفتە وەسا ب هەروە نەهاتە د هەبوونێ دا و بێ دودلی د پێشەرۆژێ دا خودان ل ئاخا خوە دەركەڤن و نفشێن بێن ب جوانی كوردستانێ بڕیڤەببن، ژ هەڤدو حەزبكن، ئێكگرتنا خوە و حەزژێكرنا كوردستانێ بپاڕێزن و ڕێكێ ل كارەساتێن دلتەزین بگرن. ل ڤێرێ ژی بەس دەولەتبوونا كوردستانێ تنێ رێگرە بۆ هەر كارەساتەكا پلان بۆ بهێتە دینان ژ ئالیێن دوژمنان ڤە، فیدرالی و خوەسەری و خوەرێڤەبرنەكا ناڤەندی یان نە ناڤەندی نابنە رێگر كو جارەكا دی كوشتار ل گەلێ كوردستانێ نەئێن راكرن و دیڕۆك دیدەڤانێ ڤێ ئێكێ یە.
سوپاس ب خودێ، ئەو ڕۆژ یا هاتی ئێدی دوژمن ب چ رەنگان نكارت كوردان بدەت راوستاندن ژ بۆ بدەستخستنا مافێن خوە یێن رەوا. ئەو دەم نەما یا كو چامێن رەش ل كوردان رادكرن و هەمی جۆرێن چەكێن لدویڤ یاسایێن ناڤنەتەوی قەدەخە دژی مللەتێ كورد یێ بێ دەستهەلات بكاردئینان و دەولەتێن ناڤنەتەوی هەمی مت و دەڤگرتی دمان. كوردستان خراب و تالان و پارچە دكرن. گەلێ كوردستانێ ئێدی خوەناسكریە ژ بۆ ئازادیێ و وەكهەڤیێ د خەباتەكا گەرم دایە، ب ئانەهیا خودێ نێزیك دێ گەهیت هەمی داخوازێن خوەیێن رەوا ل بەر چاڤێن هەر نەحەزەكی، كوردستان دێ هەر مینیت پارێز و ئاڤا.
