بۆ (سه‌رمه‌د و جاف)ی
هه‌لبه‌ست: خۆناڤ ره‌مه‌زان ئه‌یوب
وه‌رگێران ژ عه‌ره‌بی: شه‌مال ئاكره‌یی
پشتی كوشتارگه‌هێ زڤڕینه‌ڤ شنگالێ
خه‌یالا شێوازێ ژیانا وارا دكرن
ئه‌رێ خه‌لكێ به‌رێ هێشتا چاڤه‌ڕێ یا ده‌مسالا دروونێ دكه‌ت؟
خه‌یالا ره‌نگێ رۆژێن وارا دكرن
ئه‌رێ ره‌نگێ ئه‌سمانێ شنگالێ هێشتا یێ شینه!
ل رێ یێ (جاف)ی خه‌ونه‌ك دیت كو دایكا وی دێ ده‌رێ مالێ ژێڕا ڤه‌كه‌ت
لێ (سه‌رمه‌د) د سیمایێ (مایا) یێ دا نخروو ب بوو
دێ ئێرۆ ئێڤارێ بینم
نه نه به‌ریا بچمه مالێ
دو رێڤینگ د شه‌واتا هیڤیاندانه
رێ یا درێژه و
سه‌قا یێ د كه‌لا ته‌حرێ دا
(جاف) ئه‌ستوویێ رێ یێ دگریت
لێ دحه‌یتینیت: “هێی رێ یا دین، زوو ب دووماهی وه‌ره..
دایكا من نكاریت گه‌له‌ك چاڤه‌ڕێ بیت”
هه‌ڤالێ وی هێشتا یێ د خه‌نقینێ دا
“پۆر زه‌را من (مایا) ئه‌ز یێ ب رێڤه”
رێ ب داوی هات
بله‌ز ژ پاسێ بازدان
(جاف) دێ دو ده‌ستێن ب خه‌نایێ هاتین شوشتن ماچی كه
سه‌رمه‌د ژی دێ ب ئه‌ڤینا تلێن شه‌مالێن جه‌ژنا ژ دایكبوونێ هێته سۆتن.
گه‌هشتنه شنگالێ
ب بێده‌نگی، ب مه‌نده‌هۆشی، ل ئاسۆیان دنێڕی
ژ شنگالێ پرسین: كانێ شنگال؟
گه‌هشتنه شنگالێ دا ناڤێن كوشتیان بهه‌ژمێرن
گه‌هشتنه شنگالێ دا ناڤێن كه‌نیزه‌یان بهه‌ژمێرن
گه‌هشتن دا شنگالێ بهه‌ژمێرن
ژ بۆ وارگه‌هی و وانا یێن ل وارگه‌هی بوون گرین
بۆ وان گرین یێن ماین هه‌ژمار پشتی كو ژیان بوون
جاف: ده‌ری نه‌مایه
چ خانی ل ڤێره نینه ب تنێ نیڤ دیوار!
دایكا ته ژی شنگاله‌كا دێرینه
هه‌ڤالۆ خانی خۆپانه
هه‌یا گورگ ژی نه‌وێرن نێزیك ببن
مایا ژی چیرۆكا شنگاله‌كا دی یه.
ئه‌رێ یا كوشتی یه یان ب زنجیرێن تاوانباران یا به‌ند كری یه؟
هه‌ڤالۆ پرسیار دبێ مفانه
ژڤانان ژ شنگالێ باركریه
چو عاشق لێ نینه و مایا ژی.
چاوا دێ رۆژ ل باژێره‌كی هه‌لێت بێی مایا؟
پشتی جاده‌یێن دێرین ب رۆندكێن خوه شوشتین
سیهێن خوه ژی ب دووكێلا كاڤلان تژی كرین
چارچووڤه‌كێ ڤالا ژ وێنه‌ی، ل پشت راوستان
وێنه‌یه‌ك بۆ شنگالێ گرتن و
زڤڕین و نه‌ما خه‌ونان ببینن نزانن كا رێ ل كیڤه‌یه.
ب تنێ زڤڕین
مینا دو په‌یكه‌رێن ژ به‌ری، خوه ل وارا هێلان و زڤڕین…
دربێن هه‌موو جیهانێ
دربێن هه‌ڤسوو و رووره‌ش و تاوانبار و بازرگانێن چه‌قۆك و كێران
ل سه‌ر پشتا وان بوون،
بێ شنگال زڤینه‌ڤه.
