بۆ سەركردەیێن كورد ل سووریێ
د. سۆزان ئامێدی
ب دیتنا من پێدڤیە (هسد) گوتارا خۆیا “پۆپۆلیستی” بگوهۆڕێت داكو ببیتە گۆتارەكا سیاسی نەتەوەیی كوردی، كو ئەڤە ژی دبیتە پشتەڤانەك بۆ بدەستڤەئینانا جادەیا كوردی. بلا بەس بیت دەڤخۆشی و بلندكرنا درووشمان، ئەوان چو مفا تێدا نینن. هوون دكارن پەیوەندیێ ل گەل عەلەوییان بكەن،.هەلوەستەكی ب هێزی یێ نەرازیبوونا خۆ وەربگرن و ستراتیژییەكا سیاسی یا كو هەوە باش دیراسەكری بیت دابڕێژن ب ئارمانجا هندێ كو بگەهنە دیمەشقێ ژبۆ پشكداریكرن د دەسهەلاتێ و كارێ سیاسی دا. دبینم كو ئەمریكا (ترامپ) د ڤێ ئاراستەی دا دێ پشتگیریێ كەت، هەروەسا ژی جڤاكا نێڤدەولەتی ژی ل گەل هەوە بیت چونكو هوون خودانێن خۆ و مافێ خۆنە.
بەلێ هەكە هات و وەسا دەرنەكەفت ژی، ب دیتنا من شەڕ دێ ل دژی هەوە و ل دژی هەموو دەڤەرێن كوردنشین بەردەوام بیت، ڤێجا هینگی ئێدی جڤاكا نێڤدەولی ژی و تەنانەت ئەمریكا ژی ڕەنگە هاریكاریا هەوە نەكەت، چونكو هەموو د بەرهەڤ نینن و نەچار نینن مایێ خۆ د شەڕەكێ ناڤخۆی بكەن، هەكە هات و ئەو ئەڤی كاری ژی بكەن، هەلوەستێ وان دێ ل گەل لایەنێ دەستهەلاتا ناڤەندی یا (جولانی والیێ توركیا ل سووریێ) بیت، دێ هەوە ب لایەنەكی ددانن وەكو هەڕەشە ل سەر ئاسایش و سەقامگیریێ ل دەڤەرێ. ژبیر نەكەن ژی كو هاریكاریێن ئەمریكی و یێن وەكو دی، یێن كەڤن ژی و یێن نوی ژی، تەنێ بۆ هندێ هاتبوونە تەرخانكرن كو هنگ شەڕی ل دژی داعشێ بكەن.
ب راستی ئەز ب ڕیكا ئەڤێ بۆچوونێ داخوازا هەلوەشاندنا مافێن ئەو پێكهاتەیێن دیتر ل كوردستانا سووریێ ناكەم یان ئەوێن هاتینە پاشگوه ئێخستن.. بۆ نموونە گۆتارا نەتەوەخوازی یا كوردی ل هەڕێما كوردستانا ئیراقێ ب هیچ رەنگەكی كارتێكرن ل سەڕ مافێن پێكهاتەیێن دیتر نەكریە. بەلكو ژ وێ ئێكێ دوورتر دچم، ب ئەوێ ئێكێ كو مافێن پێكهاتەیان ل وان دەڤەرێن كو هێزێن كوردی ل سووریێ كۆنتڕۆلێ ل سەر دكەن، زێدەتر ژ دەڤەرێن دیتر یێن ل ژێر كۆنترۆلا هێزێن ئەحمەد ئەلشەرع دگەرەنتیكرینە. سەبارەت مسۆگەركرن و بەردەوامكرنا پشتەڤانیكرنا ئەمریكا، هیچ گوهۆرینەكێ نابینم كو بهێتە روودان؛ ئەگەر هێزێن كوردی گۆتارەكا سیاسی نەتەوەیی ب ئارمانجا دەستەبەركرنا مافێن كوردان ل سووریێ بگرنەبەر، چەندی ئەو ژبۆ نەهێلانا تیرۆرێ هاریكاریا خۆ ل گەل واشنتۆنێ بەردەوام بكەن. ژبلی ئەڤێ چەندێ ژی، ئەمریكا و هەموو وەلاتێن ڕۆژئاڤا چەندین داخۆیانی بەلاڤكرینە كو تەكەزیێ دكەن هێزێن كوردی گەرەنتیا ئێكەمینن بۆ گەهشتن ب ئاسایشێ و سەقامگیریێ ل دەڤەرێ و واقع ژی ئەڤێ چەندێ دسەلمینیت و هەرێما كوردستانێ ژی نموونەیەكێ ڕۆن و ئاشكرایە بۆ ئەڤێ چەندێ.
ب ڕاستی هێزین (هسد) و هێزێن كوردی یێن دیتر هەڤپەیمانی ل گەل پێكهاتەیێن دیار ژی هەنە ئەو ژی ل گەل وان دپشكدارن. ئەگەر گۆتارا نەتەوەخوازی هەڕەشێ ل ڤێ هەڤپەیمانیێ بكەت، هینگی دێ نیازێن هندەك هەڤپەیمانان ئاشكرا كەت، چەندی كو ل بەرامبەر ستەمكاریا ل كوردان دهێتەكرن بێدەنگ بمینن. ل گەل ڤێ ژی؛ نابیت كاریگەریێ ل سەر بەردەوامكرنا دیالۆگا نیشتمانی ل گەل ئەوان و ل گەل خەلكەكێ دیتر ژی بكەت.
ل دوماهیێ دێ بیژین:
ئەرێ مانە بەسە مافێن كوردان هەردەم ملكەچی واقعەكی ببن كو ب دەستێ دەستهەلاتا ناڤەندی ئەڤ واقعە ل سەر كوردان و ل سەر دەڤەرێن كوردستانی هاتیە سەپاندن؟، بۆچی ئەڤ واقعە ناهێتە گوهارتن ل دەمێ كو دەرفەت بۆ بدەستڤەئینان و دەستەبەركرنا مافێن كوردان د دەستوورەكێ دادپەروەردا دهێتە پێش؟
و/ شێرزاد نایف
