بۆ قۆناغا سێیێ 36 یانەیێن ئیراقێ دێ هێنە دهۆكێ
قەیس وەیس:
د داخویانیەكێ دا سەرۆكێ لژنەیا دادڤانان ل فدراسیۆنا پایسكلڤانێن ئیراقێ دیار كر پشتی ب دووماهی هاتنا قۆناغا دویێ یا قارەمانییا یانەیێن ئیراقێ ل سەر ئاستێن جودا، بڕیار هاتیە دان قۆناغا سێیێ پارێزگەها دهۆكێ مێڤاندارییا وێ بكەت.
زێدەتر هشیار فەریق بۆ رۆژنامەیا ئەڤرۆ گۆت: ل دووڤ نەخشەیێ وەرزێ ئەڤ سالە قارەمانییا یانەیێن ئیراقێ بۆ ئاستێن پێشكەفتی، لاوان، تازەپێگەهشتی، پشكۆژ و كچان بۆ چار قۆناغان هاتینە دانان، قۆناغا ئێكێ ل پایتەختێ ئیراقێ بەغدا هاتبوو كرن، قۆناغا دویێ ل دەسپێكا مەها بهێت دێ ل باشۆرێ ئیراقێ بیت دووڤدا بڕیار هاتیە دان قۆناغا سێیێ پارێزگەها دهۆكێ مێڤاندارییا وێ بكەت، وەكو هەر سال ئەڤچەندە ژی هاتییە ژبەركو فدراسیۆنا پایسكلڤانێن ئیراقێ گرنگییەكا تایبەت دایە پارێزگەها دهۆكێ و دبینیت ژلایەنێ سرۆشتی، ڕێك، ئارامی و ڕێكخستن هەموو د پلەكا نایاب دانە، لەوما ژی ڕژدی ل سەر هەلبژارتنا پارێزگەها دهۆكێ بۆ هەر مێڤاندارییەكێ كرییە.
ل دووماهیێ ناڤهاتی دیاركر هەردەم پارێزگەها دهۆكێ بۆ هەر قارەمانییەكا وەرزشی باشترین شێوە بەرهەڤ بوویە و ڕێكخستنەكا جوان و سەردەمانە كرییە ژبەركو هەموو لایەنێن پەیوەندیدار هەڤكار و پشتەڤانن، بۆ وەرزێ ئەڤ سالە ژی گەشبینن دێ ڕێكخستنەكا سەركەفتی بیت.
بۆ زانین ل سەر هەموو ئاستان قارەمانی ب پشكدارییا 36 یانەیێن ئیراقێ و هەرێما كوردستانێ دهێتە كرن، تاكە یانەیا پارێزگەهێ لاوێن دهۆكێ نە ئەوێن د قۆناغا ئێكێ دا شیاین رێزا دویێ ب دەستڤە بینن هەروەسان یاریزانێ پشكۆژێ دهۆكێ عەبدولرەحمان شیڤان ئەكرەم ل سەر ئاستێ تاك ناسناڤ دەستڤە ئینایە، دیسان تیما پایسكلڤانێن دهۆكێ یا لاوان ب سەرپەرشتییا ڕاهێنەرێ باژێرێ دهۆكێ تارق سەعید یە كو ڕاهێنەرێ هەلبژارتیێ ئیراقێ یە و یاریزانێن پشكدار هەر ئێك ژ یوسف جیهاد، محەمەد سادق نوری، ئیهاب عومەر، ئارام سەباح، ئاڤەند هشیار فەریق و عیسام عەلی.
