بۆ قەرەبووكرنا ئاوارەیان داخوازێ دكەین فشارێ بێخنە سەر ئیراقێ
دهۆك، لەزگین جوقی
رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ راگەهاند، پێدڤیە نەتەوێن ئێكگرتی كار لسەر قەرەبوویا ئاواران بكەن، دا كۆ ئاوارە بشێن ڤەگەرنە سەر مالێن خۆ و هەتا نوكە پتر ژ دوو هزار خێزان پشتی ڤەگەریاینە سەر مالێن خۆ دووبارە ئاوارە بووینە.
پیر دەیان، رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ ڕاگەهاند، نوكە حۆكمەتا هەرێما كوردستانێ هەڤكاری و پشتەڤانیا ئاواران دكەت وەكۆ دیتر ژلایێ رێكخراوان ڤە هەڤكاری و پشتەڤانیا ئاواران كێم بووویە و نەمایە، ئەم داخوازێ ژ نەتەوێن ئێكگرتی دكەین كۆ فشارێ بێخنە سەر حۆكمەتا ئیراقێ بۆ قەرەبووكرنا ئاواران داكۆ بشێن ڤەگەرن.
زێدەتر گۆت: د ڤان ساڵین بووریدا پتر ژ دوو هزار خێزانان پشتی ژ كەمپان ڤەگەریاینە سەر مالێن خۆ و دووبارە ژ سەر جهێن ئاكنجیبوونا خۆ ئاوارە بووینە و قەستا ناڤ كەمپان كریە.
ژ ئالیەكێ دیتر، نەتەوێن ئێكگرتی راگەهاند، ڤەگەراندنا ئاواران بۆ سەر جهـ و وارێن وان یا بەردەوامە، هەتا 110 هزار ئاواران دناڤ 20 كەمپێن هەرێما كوردستانێ دژین.
كۆمسیۆنا بلندا نەتەوێن ئێكگرتی راگەهاند، هەرێما كوردستانێ پێشوازیی ل زێدەتر ژ 110 هزار ئاوارێن نافخۆیا ئیراقێ كریە، ئەڤ ئاوارە لسەر 20 كەمپێن جیاواز ل هەرێمێ هاتینە دابەشكرن.
نەتەوێن ئێكگرتی گۆتژی: ل سالا 2025ێ هزار و 221 خێزان كۆ پێكهاتنە ژ پێنج هزار و 580 كەسان كەمپێن ئاواران بجهـ هێلاینە و ڤەگەریاینە سەر جهێن ئاكنجیبوونا خۆ ل پارێزگەهێن نەینەوا، سەلاحەدین و چەندین پارێزگەهێن سەر ب ئیراقێ ڤە.
