بۆ كارێن هونه‌ری كه‌س پشته‌ڤانیا مه ناكه‌ت
دهۆك، زنار تۆڤی:
سترانبێژ ژیان داود عه‌بدوللا، كو ب (ژیان جزیری) دهێته نیاسین، د دیداره‌كێ دا بۆ رۆژناما ئه‌ڤرۆ دیاركر كو ل سالا 2015 وێ ده‌ست ب گۆتنا سترانان كریه، به‌ری نوكه دو كلیپ چێكرینه، لێ ب دلێ وێ نه‌بووینه، له‌ورا نوكه یا به‌رهه‌ڤیان بۆ تۆماركرنا كلیپه‌كا دی دكه‌ت.
ژیانێ گۆت: ژ به‌ر نه‌بوونا پشته‌ڤانیێ و سپۆنسه‌ران هه‌تا نوكه من چو ئه‌لبۆم چێنه‌كرینه، هه‌رچه‌نده حه‌زا من یا سه‌ره‌كی ئه‌وه ئه‌لبۆمه‌كا سترانان چێكه‌م، لێ مخابن، هه‌تا نوكه بۆ من ئه‌و ده‌لیڤه چێ نه‌بوویه، هه‌روه‌سا ده‌مێ ئه‌م دبێژین، هاریكاریا مه بكه‌ن ژ بۆ چێكرنا ستران و كلیپان، كه‌س یێ به‌رهه‌ڤ نینه پشته‌ڤانیا مه بكه‌ت، ب تایبه‌تی ژی ئه‌م وه‌كو سترانبێژێن رۆژئاڤایێ كوردستانێ، هه‌روه‌سا گه‌له‌ك ئاسته‌نگ ژی ل پێشیا كارێ مه هه‌نه، و ده‌مێ كچ سترانان دبێژن خه‌لك ب چاڤه‌كێ كێم ته‌ماشه‌ی وان دكه‌ن، هه‌ر چه‌نده مالباتا من گه‌له‌ك پشته‌ڤانیێ ل من دكه‌ن، كو ئه‌ز سترانان بێژم، لێ سترانبێژ و هونه‌رمه‌ندێن هه‌رێما كوردستانێ پشته‌ڤانیێ ل مه ناكه‌ن، لێ مه هه‌ر به‌رده‌وامی ب هونه‌رێ خوه دایه.
