بۆ ماوەیێ 12 سالانە پەیمانگەها پەروەردەیا وەرزشی یا زاخۆ د ئاڤاهیێ قوتابخانەیەكێ دا دەوامێ دكەن
زاخۆ، دلۆڤان هالۆ:
پەیمانگەها پەروەردا وەرزشی یا زاخۆ یا سەر ب ڕێڤەبەریا گشتی یا پەروەردا ئیدارەیا سەربخوە یا زاخۆ ڤە، ل سالا 2014ێ هاتیە دامەزراندن، ژ هینگێ وەرە دبنە 12 سال كو ئەڤ پەیمانگەهە بێ ئاڤاهیێ خوە یێ تایبەتە، ژ نەچاری د ئاڤاهیێ قوتابخانا نیرۆژ یا بنەڕەتیدا دەوامێ دكەن.
سەلام پیرۆ، ڕێڤەبەرێ گشتی یێ پەروەردێ ل ئیدارەیا سەربخوە یا زاخۆ بۆ ڕۆژناما ئەڤرۆ دیار كر، ل دەمێ دامەزراندنا پەیمانگەها پەروەردا وەرزشی یا زاخۆ هەرێما كوردستانێ تووشی دوو قەیرانێن مەزن بوو كو ئێك ژ وان شەڕێ تیرۆریستێن داعش بوو، یا دووێ ژی بڕینا بەشێ بودجێ هەرێما كوردستانێ بوو، لەوڕا د شیان دانەبوویە كو ئاڤاهیەكێ تایبەت بۆ ڤێ پەیمانگەهێ بهێتە ئاڤاكرن.
ناڤهاتی ئاماژە ب وێ چەندێ ژی كر، ل وی دەمی ئەز وەكو بەرپرسێ ئێكەتیا مامۆستایان ل زاخۆ دناڤ بابەتی دا بووم كو مە دیت گۆنجایترین جهـ بۆ ڤێ پەیمانگەهێ ل قوتابخانەكا سەر ب پەروەردا زاخۆ ڤە دەوامێ بكەت كو قوتابخانا نیڕۆژ یا بنەڕەتیە، چونكی ئەو قوتابخانە نێزیكی ڕێڤەبەریا وەرزش و لاوانە و قوتابیێن پەیمانگەهێ دشێن مفایی ژ یاریگەها گرتی یا وێ ڕێڤەبەریێ وەرگرن كو یاریێن خوە تێدا ئەنجام بدەن.
گۆت ژی:» ئەو ئاڤاهیێ ب كێر پەروەردا وەرزشی بهێت جودایە ژ ئاڤاهیەكێ دی یێ قوتابخانەیان، چونكی پەیمانگەهێ پێدڤی ب هۆلێن گرتی و گۆڕەپانێن وەرزشی هەیە، لەوڕا ئەم وەكو پەروەردا زاخۆ ب هەموو شیان ڤە دێ لگەل لایەنێن پەیوەندیدار ل سەر خەت بین كو زێدەتر خزمەتا ڤێ پەیمانگەهێ بهێتە كرن».
