بۆ ناسناڤێ ئیراقێ ڤۆلی بۆلا سەنحاریب ئالایێ هەڤڕكیێ ڕاكرییە
قەیس وەیس:
پشتی ب دووماهی هاتنا یاریێن قۆناغا ئێكێ و ڤاڤارتنێن دەربازبوونێ بۆ خولا پلا نایابا ئیراقێ یا ڤۆلی بۆلێ ل سەر ئاستێ كچان، چوار یانە ژ هەرێما كوردستانێ دەربازبوونا خوە مسۆگەر كرییە و دێ ل ناڤەڕاستا مەها بهێت ل هەولێرا پایتەخت بزاڤێ بۆ دەستڤە ئینانا ناسناڤێ ئەڤ سالە یێ خولا ئیراقێ یا پلا ئێك كەن.
ئەو هەر چار یانەیێن دەربازبوو هەر ئێك ژ، یانەیا سەنحاریب نوونەرا پارێزگەهێ، یانەیێن ئەكاد عەنكاوە و ئەفرۆدێت، دەربەندیخان، هەروەسان هەردو یانەیێن قەرەقۆس و ئەمانەت بەغدا ژی دەربازبوونە قۆناغا دویێ و چارگۆشەیا زێرین ئەوا بڕیارە هەڤڕكیێن وێ ل 17ێ مەها بهێت هەولێرا پایتەخت مێڤاندارییا وێ بكەت.
ل دۆر ڤێ یەكێ حەبیب ئەللاوەندی سەرۆكێ فدراسیۆنا ڤۆلی بۆلا ئیراقێ گۆت: سۆپاس بۆ بەرپرسێن وەرزشی ل كوردستانێ و پارێزگەها حەلەبچە ئەوێن پشتەڤانییا مە كرین ژبۆ سەركەڤتنا قۆناغا ئێكێ، دیسان سۆپاسییا هەموو یانەیێن پشكدار دكەین، ژبەر خالێن سەركەڤتنێ و هەبوونا ژێرخانەیا وەرزشی و هەر تشتەكێ پێدڤی مە بڕیا ردا قۆناغا دویێ و چارگۆشەیا زێرین ل هەولێرێ بیت.
ل دۆر بەرهەڤیێن تیما یانەیا سەنحاریب داود رەبەن سەرۆكێ یانەیێ بۆ رۆژنامەیا ئەڤرۆ گۆت: پشتی گەهشتنا مە بۆ قۆناغا دووماهیێ یا قارەمانیێ، هەرزوو كادرێ ڕاهێنانێ دەست ب پلانەكا نوو كرییە ئەوژی چاوانا هەڤڕكیێ دگەل یانەیێن پشكدار ژبۆ سەركەڤتنان، خالێن هێزێ و كێماسیێ هاتینە بەرچاڤكرن، بۆ مە گرنگ ئەوە ئەم دڤێ قارەمانیێ دا بێ دەستكەڤت نە دەركەڤین، لەوما ژی وەكو كارگێری ب ڕژدی لسەر تیمێ ڕاوەستیێن باشترین نوونەربین بۆ پارێزگەها خوە و كوردستانێ، هیڤییا مە ئەوە بەرپرسێن وەرزشی ل دهۆكێ و پارێزگارێ دهۆكێ پشتەڤانییا تیما مە بكەت.
بۆ زانین قۆناغا ئێكێ یا خولا پلا ئێكا ئیراقێ ل پارێزگەها هەلەبچەیا شەهید هاتبوو كرن ئەو ب پشكدارییا 10 یانەیان و هاتبوونە بەلاڤكرن ل سەر دو كۆمان، كۆما ئێكێ پێكهاتی بوو ژ، ئەكاد، قەرەقۆش، ئەمانەت بەغدا، موعەلمین، تەق تەق، كۆما دویێ پێكهاتییە ژ، سەنحاریب، ئەفرۆدێت، دەربەندیخان، هەلەبچە و شۆرجە، سێ تیم ژ هەر كۆمەكێ‌َ دەربازبوونە خولا پلا نایابا ئیراقێ و بڕیارە قۆناغا دویێ ژبۆ دەستنیشانكرنا قارەمانا وەرزێ ئەڤ سالە ل 17ێ ڤێ مەهێ ل هەولێرا پایتەخت بهێتە كرن.
