بۆ وان کەسێن نارگیلێ دکێشن
ئەڤرۆ نیوز، زنار تۆڤی:
ڤەکۆلەر ل زانکۆیا لۆس ئەنجلوس یا ئەمەریکی، د ڤەگۆلینەکا نوو دا گەھشتینە وی ئەنجامی، کو کێشانا نارگیلێ مەترسیەکا زێدەتر ژ جگارێن ئاسایی ل سەر دلی و کۆئەندامێن دەماران دروست دکەت.
ئەڤ ڤەکۆلینا ھەڤبەرکری د گۆڤارەکا ئەمەریکی یا تایبەت ب دلی ب ناڤێ American Journal of Cardiology بەلاڤەکریە، کو تێدا بەحس ل ھندێ دکەت، کێشانا ئێک نارگیلێ، لێدانێن دلی د خولەکەکێدا، 16 جاران ب لەزتر لێ دکەت و گوشارێن خوینێ ژی بلند دکەت.
گەلەک کێشانا نارگیلێ، دبیتە ئەگەرێ تەسکبوونا دەماران و خوینبەری و خوینھێنەری، ل گەل تووشبوونێ ب نەخۆشیێن دلی.
پسپۆران د ڤێ ڤەکۆلینا نوو دا، 48 خۆشبەخش وەک نموونە وەرگرتینە، کو ژیێ وان دناڤبەرا 18 بۆ 34 سالان دا بوویە، ھەر ئێکێ ژ وان بۆ ڤێ ڤەکۆلینێ بۆ دەمێ نیڤ دەمژمێرێ نارگیلە کێشایە.
ڤەکۆلەران بەری کێشانا نارگیلێ و پشتی کێشانێ، بەرێخودایە لێدانێن دلێ وان کەسان، ل گەل ئاستێ نیکۆتینی دناڤ خوینێدا.
ڤەکۆلەر گەھشتینە وی ئەنجامی، کو کێشانا نارگیلێ ب شێوەکێ بەردەوام، زیانێن وێ گەلەک ژ یێن جگارێن ئاسایی زێدەترە، ھەروەسا گۆتیە، ئەو کەسێن دبێژن کو کێشانا نارگیلێ ساخلەمترە ژ کێشانا جگارێ، ب ھیچ شێوەکێ یا راست نینە.
ڤەکۆلەران گۆتیە ژی، ئەو تووتنا بۆ نارگیلان دھێتە ب کار ئینان، ھندەک مادێن کیمیایی یێن دروستکری تێدا دھێنە ب کارئینان، کو زیانێن وێ بۆ لەشێ مرۆڤی گەلەکن، دیسان ب کارئینانا وان مادێن کیمیایی ژی گەلەک ژ مێژە د دروستکرنا تووتنا جگا‌ران دا ھاتینە قەدەغە کرن.
