بۆ وەرزێ بهێت سێمێل دێ ب نفشەكێ نوو هەڤڕكیێ كەت
شاهۆ فەرید:
د داخویانیەكێ دا سەرۆكێ یانەیا سێمێلێ لدور بەرهەڤیێن تیما وان ژیێ دبین 20 سالیێ دا بۆ رۆژنامەیا ئەڤرۆ دیار كر پشتی دەست ب دانانا تیمەكا نوو ب نڤشەكێ نوو یێ یاریزانێن كوڕێن باژێری گەشبینن هەڤڕكیێ بۆ ڕێزێن باش د خولا كوردستانێ دا بكەین.
زێدەتر د. هاریوان عابد گۆت: ژبۆ باشترین بەرهەڤی بۆ وەرزێ نوو وەكۆ كارگێریا یانەیێ ستافەكێ نوو و ژێهاتی یێ راهێنەران و گەنج دانا بۆ تیما مە ب سەرپەرشتیا كوڕێن باژێرێ سێمێلێ كوسرەت حسێن و بەختیار و نەشئەت، تاقیكرن بۆ پتری دو سەد یاریزانان هاتە ئەنجامدان شیان 30 یاریزانان بۆ تیمێ هەلبژێرن، دێ پشتەڤان و هاریكاریەكا باش بۆ ئەڤان یاریزانا كەین پشتبەستنێ بۆ داهاتی دەینە سەر یاریزانێن ئەڤێ تیمێ، هەمی پێدڤیێن وان بۆ دابینكرنە، ئەم هیڤی نە ئەڤێ تیمێ هەڤركیێ بۆ خول و ناسناڤا بكەن دێ لسەر پالپشتی و هاریكاریا وان بەردەوامبین.
ژلایەكێ دوویڤە راهێنەرێ تیمێ كوسرەت حسێن گۆت: ئەڤە ماوەیێ پتری مەهەكە مە یەكەیێن راهێنانێ ئەنجامداینە، یاریێن هەڤالینێ مە كرینە و ئاستێ پێدڤی نیشانداینە باوەریەكا باش من ب وان هەیە، ئارمانجامە دانانا بنیاتەكێ باشە بۆ تیمێ و تایبەت یانەیا سێمێلێ بۆ داهاتی، ڤەكرنا خولێ ئەڤی دەمی دا دەلیڤەكا باشە بۆ یاریزانێن بەهرەیا خوە نیشانبدەن و یاریزانێن باش بۆ تیمین خوە بینی و ژێبگریی، ئەم پشتبەستێ یاریزانێن خوە دكەین بۆ هەڤركیێ و دەستڤەئینانا پلێتا دەربازبوونێ هەر شەش یارێن مە هەڤركی دێ یا دژواربیت.
كوسرەتی گۆت ژی: نە باشییا ئەردێ یاریگەهێن مە دبیتە ئەگەر ئەم نەشێن یاریا سەردەمیانە دناڤ دا ئەنجامبدەین، یاریزان ژی پێدڤیە چاڤدانا خوە بكەت ژلایێ جەستەیی ڤە خوە خرابیا دەتە پاش و پتر لسەر خوە كاربكەتن شیانێن خوە باشتر لێبكەتن.
