بۆ پاشكۆیێ كۆپا ئاسیا چار یاریزانێن كوردستانی دێ یاریێ بەرانبەری هندستانیان كەن
قەیس وەیس:
د داخویانیەكێ دا حسێن ئەلعمێدی سەرۆكێ فدراسیۆنا باسكێت بۆلا ئیراقێ دیار كر پلانەكا تایبەت و ڕێكخستی بۆ یاریێن پاشكۆیا دووماهیێ یا كۆپا ئاسیا دەربازبوون بۆ قارەمانییا ئاسیا دانایە و ڕاهێنەری كۆمەكا باش ژ یاریزانێن نافخوە و ڕەڤەندا ئیراقی داخوازكرینە بۆ ناڤ كەمپێ ڕاهێنانێ دا و بڕیارە ل 18ێ ڤێ مەهێ كەمپەكێ دی ل بەحرەینێ ب دانن بەری ئێك ژ دیدارێن ڤەبر یێن پاشكۆ دگەل هەلبژارتیێ هندستانێ ئەوا دێ ل بەحرەینێ هێتە كرن.
ل دووڤ ئەوێ لیستا بەلاڤكری یا ڕاهێنەرێ هەلبژارتیێ هەلبژارتیێ ئیراقێ یێ سربی فازلین ماتیچ چار یاریزانێن كوردستانی د ناڤ دانە كو پێكهاتینە هەر ئێك ژ، محەمەد عەلی موراد ژ یانەیا زاخۆ، فەرید رەعدی خەلكێ باژێرێ دهۆكێ ژ یانەیا ئەلكەرخ یا بەغدایی، محەمەد ئەمین عەبدولخالق خەلكێ هەولێرا پایتەخت ژ یانەیا غاز ئەلشیمال و رێكان عوسمان یێ ڕەڤەندا كورد ل ئۆرۆپا و یانەیا شورتە یا بەغدایی.
لدۆر ڤێ یەكێ فەرید رەعدی ئێك ژ یاریزانێن داخوازكری بۆ رۆژنامەیا ئەڤرۆ گۆت: پێخوەشحالم بۆ جارا گەلەكێ یە دهێتە داخوازكرن دناڤ رێزێن هەلبژارتیێ ئیراقێ دا و خوەشتر ئەوە دەمێ كۆمەكا یاریزانێن كوردستانی ژی دناڤ دابن، پێنەڤێت ئەڤە ژی بەلگەیە كو یاریزانێن كوردستانی ژی شیانێن باش یێن هەین هەكە پشتەڤانی ژلایێ یانەیان بۆ بهێتە كرن، ئاستێ مە هیچ كێمتر نینە ژ یاریزانێن دی یێن ئیراقێ هەر باشتر نەبیت، چوونا من بۆ ناڤ رێزێن هەلبژارتیێ ئیراقێ ب سانەهی نینە لێ ئەو ماندی بوون و پێشئێخستنا ئاستێ هونەری و تەكتیكی ئەم شیاین ب گەهینە ڤێ قۆناغێ، ژێگرتنا یاریزانان ل دووڤ میكالزم و ستاندەرێن تایبەت دچیت ژبەر یاریزانێ باسكێت بۆلێ نە وەكو یاریزانێ تەپاپێی یان هەر یارییەكا دی یە، یا گرنگ وەكو كوردستانی ئەم چار یاریزان دناڤ پێكهاتیێ تیمێ دا بین بۆ یارییا بەرانبەر هندستانێ قۆناغەكا گرنگە بۆ پێشئێخستنا ئاستێ خوە.
