بۆ پشتەڤانییا رۆژئاڤایێ كوردستانێ دێ كۆنسێرتەكێ گێڕیت
زنار تۆڤی:
هونەرمەندێ ناسیارێ كورد، هۆزان دینۆ، بڕیار دا كۆنسێرتەكا مەزن ل وەلاتێ ئەلمانیا ئەنجام بدەت، ب مەرەما كۆمكرنا هاریكارییان بۆ خەلكێ رۆژئاڤایێ كوردستانێ، كو د ڤان رۆژێن دژوار دا دەرباز دبن.
ناڤبری گۆت: وەك هەڤخەمیەك بۆ ئازارێن خەلكێ رۆژئاڤا، د وان كۆنسێرتان دا ئەز چ سترانێن گۆڤەند و شەهیان نابێژم، ب تنێ دێ سترانێن نەتەوەیی و شۆرەشگێری پێشكێش كەم، ئەڤ هەلویستە پشتەڤانیەكە بۆ گەلێ كورد ل هەمبەر وان فشار و هێرشێن ل سەر رۆژئاڤا دهێنەكرن، كو كۆنسیرتا ئێكێ ل باژێرێ ئۆتریخت ل هۆلەندا من ئەنجامدایە و هەموو پلێت هاتبوونە فرۆشتن و پشكەكا داهاتی بۆ رۆژئاڤا هاتیە تەرخانكرن، كۆنسیرتا دویێ ل 31 ی ڤێ هەیڤێ دێ ل باژێرێ شتوتگارت ل ئەلمانیا گێڕم و هەموو داهاتێ وێ كۆنسێرتێ دێ وەك هاریكاری بۆ رۆژئاڤا هێتە هنارتن و دخوازم هەر كەسەك ل دووف شیانێن خۆ پشتەڤانیا گەلێ رۆژئاڤا بكەن، چنكو ب مخابنی ڤە، رەوشا رۆژئاڤا یا باش نینە و خەلكێ مە د رۆژێن گەلەك دژوار و سەخت دا دەرباز دبیت، بەلێ دڤێت ئەم ل سەر پێیێن خۆ راوەستین، ب هێز بین و بەردەوامیێ بدەینە خەباتا خۆ، هەروەسا ئارمانجا من ئەوە ل پاشەرۆژێ نە ب تنێ ل ئورۆپا، بەلكو ل هەر چار پارچەێن كوردستانێ كۆنسێرتان بگێڕم و هونەرێ خۆ پێشكێشی ئاخ و وەلاتێ خۆ بكەم.
