بۆ چارەسـەرکرنا پرسا کـوردی دڤێت دستوورێ تورکـیا بهێتە گـوهـۆڕین
پارتەکا کوردی ل ئستەنبولێ دیار دکەت، دستوورێ نها یێ تورکیا نەشێت ببیتە بەرسڤ بۆ پرسێن هەی و رەوشا نها یا تورکیا ژی نیشا ددەت پێدڤیا جڤاکێ تورکیا ب دستوورەکێ نوو هەیە کو ببیتە ژێدەرێ چارەسەریا پرسێن تورکیا ب تایبەتی ژی پرسا کوردی.
ل باژێرێ ئستەنبولێ یێ تورکیا کۆنفرانسەک ل ژێر ناڤێ بزاڤێن ژ بۆ دیموکراسیێ و دستوورەکێ نوو بۆ تورکیا هاتە ساز کرن و هۆدار پار کو پارتەکا کوردیە پشکدار بوو و داخواز کر ژ بۆ چارەسەرکرنا پرسا کوردی و پرسێن دی یێن تورکیا دستوورێ نها یێ تورکیا بهێتە گوهۆڕین، چونکی دستوورێ نها یێ تورکیا بەرهەمێ کۆدەتایا سالا ١٩٨٢ و نابیتە بەرسڤ ژ بۆ چارەسەرکرنا پرسێن نها یێن تورکیا، ژ بەر ڤێ یەکێ ژی دڤێت بەری هەر تشتەکێ ژ بۆ دیموکراسیێ و پێشڤەبرنا تورکیا و چارەسەرکرنا پرسا کوردی دستوورێ نها یێ تورکیا بهێتە گوهۆڕین.
هۆدار پارێ داخواز ژی کر کو د دستوورێ نوو یێ تورکیا دا هەبوونا گەلێ کوردی ب فەرمی بهێتە قەبوول کرن و هەموو ئاستەنگێن ل هەمبەر خەباتا سیاسی و کەلتوری یا گەلێ کورد بهێنە راکرن و ئێدی کورد بشێن وەکو تورکان ل تورکیا بگەهنە هەموو مافێن خوە و زۆرداریا ل سەر گەلێ کورد ژی ب دووماهی بهێت.
ل ئالیێ دی گەلەک ژ نڤیسەر، کەسێن ئەکادیمی و رەوشەنبیر یێن پشکدار د کۆنفرانسێ دا ژی دیار کرن، پێدڤیا تورکیا ب دستوورەک نوو و پێشکەفتی هەیە، دڤێت تورکیا پرسێن خوە چارەسەر بکەت و ژ بۆ چارەسەرکرنا پرسا کوردی و پێشکەفتنا دیموکراسیێ ژی بێگومان پێدڤیا تورکیا ب دستوورەک نوو هەیە، هەکە دستوورەک نوو بهێتە ئامادەکرن ژی دڤێت هزرا هەموو تشتەکێ بهێتە کرن، نابیت دستوور تنێ ژ بۆ بەرژەوەندیێن هندەک هێزێن سیاسی بهێتە ئامادە کرن، دڤێت دستوورێ نوو ببیتە ژێدەرێ چارەسەرکرنا هەموو پرسێن تورکیا ب تایبەتی ژی پرسا کوردی، هەتا دستوورەک نوو و دیموکرات بۆ تورکیا نەهێتە دانان و تێدا هەبوونا گەلێ کورد ب فەرمی نەهێتە قەبوول کرن گەلەک زەحمەتە شەڕ و ئالۆزیێن چەندین سالێن بۆری ل تورکیا ب دووماهی بهێن.
ئەو یەک د دەمەکێ دایە، کو بەری نها سەرۆک کۆمارێ تورکیا ژی دیار کربوو ئێدی دڤێت تورکیا خوە ژ دستوورێ سالا ١٩٨٢ قورتال بکەت، چونکی دستوورەک کەڤنە و ژ ئالیێ کەسێن کۆدەتاچی ڤە هاتیە نڤیسین و هەکە تورکیا ببیتە خوەدانا دستوورەک نوو و پێشکەفتی دێ شێت هەموو پرسێن خوە ژی چارەسەر کەت، ژ بۆ ڤێ یەکێ ژی دڤێت هەموو هێز و ئالیێن سیاسی ل تورکیا هزرا پاشەرۆژا وەلاتی بکەن و نەبنە ئاستەنگ ل هەمبەر ئامادەکرنا دستوورەکێ نوو بۆ تورکیا.
