بۆ یارییا نەهێ ل دووڤ ئێك دهۆك نەشیا گرێیا سەركەڤتنان ڤەكەت
قەیس وەیس:
ب دووماهی هاتنا هەڤڕگیێن گەڕا 37ێ و بەری دووماهیێ ژ خولا ستێرێن ئیراقێ یا فوتبۆلێ هەردو یانەیێن دهۆك و هەولێرێ تووشی مەزنترین خوسارەتی بوون و زاخۆ و نەورۆز بەردەوامی دانە سەركەڤتنان، ژلایێ خوەڤە یانەیا شورتە كاسا خولێ ب فەرمی بلندكر.
بۆ یارییا نەهێ ل دووڤ ئێك سەركەڤتن نە ئینا
تیما فوتبۆلا یانەیا دهۆكێ بۆ یارییا نەهێ ل دووڤ ئێك نە شیا دلێ جەماوەرێ خوە خوەشبكەت پشتی بەرانبەر مێڤانا خوە یانەیا نەورۆز ب چار گۆلان بەرانبەر گۆلەكێ تووشی خوسارەتییەكا مەزن و نە چاڤەڕێ كری بوو د هەڤڕكیا واندا ئەوا ل شەڤا دەربازبووی ل یاریگەها یانەیا دهۆكێ بێ جەماوەر هاتیە كرن پشتی فدراسیۆنا فوتبۆلا ئیراقی یانەیا دهۆكێ سزادایی، هەرچەندە تیما دهۆكێ هەتا خولەكا 32 یا پێشكەڤتی بوو ب گۆلا یاریزانێ خوە حەسەن عیماد ئەوا د خولەكا نەهێ دا هاتییە تۆماركرن، لێ هێرشبەرێ نەورۆز ئاسۆ رۆستەم گۆلا وەكهەڤیێ دخولەكا 33ێ دا ئینا، دنیڤا دویێ دا دگەل پاشڤەچوونا ئاستێ یاریزانێن دهۆكێ تیما نەورۆز شیا سێ گۆلێن دی بكەت و یاریێ ب4-1 ب دووماهی بینیت.
دهۆك ڕێزا چەندێ دهێت و گۆلكەرێن وێ كینە؟
پشتی ژدەستدانا سێ خالێن ڤێ یاریێ تیما دهۆك بەردەوامە ل سەر ئانجامێن لاواز كو دبیتە خوسارەتییا نەهێ ل دووڤ ئێك و یا 13 د خولێ دا بەرانبەر 15 سەركەڤتن و نەهـ وەكهەڤییان ما ل ڕێزا هەشتێ ب كۆمكرنا 54 خالان، ژلایەكێ دووڤە تیما دهۆكێ 39 گۆلان دا هەیە سەرجەمێ 40 گۆلان هەنە و 40 گۆل ل سەر هاتینە تۆماركرن، گۆلكەرێن دهۆمێ بڤی شێوەیی نە و بڤی ڕەنگی، پیتەر گۆرگیس هەشت گۆل، پاشەنگ عەبدوللا حەفت گۆل، كەریم دەرویش شەش گۆل، ئیبراهیم غازی سێ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و لۆكاس هێنریك و سیابەند عەگید، هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، موسیس، زانا عەلی و حەسەن عیماد گۆلەك تۆماركرینە، ژلایەكێ دووڤە گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر
سلێمان رەمەزان ل جهێ ئەمیر ئەزرەڤشان هاتە دانان
ل درەنگییا شەڤا دوشەمبیێ كو پشتی ب دووماهی هاتنا یارییا دهۆك بەرانبەر نەورۆزێ، ئەمیر ئەزرەڤشان ڕاهێنەرێ كوردێ رۆژهەلاتێ كوردستانێ و ڕەڤەندا كورد ل سوید ب فەرمی دەست ژ كارێ خوە كێشا و نە شیا چو سەركەڤتنان بۆ تیما دهۆكێ بینت ئەوێ ل جهێ مەسعۆد میرالی هاتبوو دانان، كارگێرییا یانەیا دهۆك ل جهێ وی كوڕێ باژێرێ دهۆكێ سلێمان رەمەزان وەكو ڕاهێنەر ل جهێ وی دانان ئەوێ سەربۆرەكا درێژ و سەركەڤتی هەی و خودان باوەرنامەیا پرۆ یا ئاسیایی، د یسان ل وەرزێ 2021-2022 شیایی تیما دهۆكێ بگەهینە خولا ستێرێن ئیراقێ.
سەرۆكێ یانەیا دهۆك بانگەوازیەك بەلاڤكر
د تۆرێن چڤاكی دا د. عەبدوللا جەلال بانگەوازیەك بۆ پشتەڤانێن یانەیا دهۆكێ بەلاڤكر و بڤی شێوەیی گۆت: راستە تیم د بارودوخەكێ گەلەك لاواز دەرباز دبیت، لێ دڤێت ئەم بێ هیڤی نەبین و كۆپا ئیراقێ یا ل پێشییامە، سۆپاس بۆ كاپتن ئەمیر ئەزرەڤشانی و سۆپاس بۆ كاپتن سلێمان رەمەزان كو دڤێ بارودوخێ خراب دا تیم وەرگرتی، دیسان سۆپاسیا جەماوەرێ خوە دكەین دبهێنفرەهبووینە بەرانبەر ئەنجامێن تیما مە یێن لاواز كو نەهـ یارییان دا هیچ سەركەڤتن نە ئینایە.
هەروەسان گۆت: مە دەلیڤەیەكا باش د كۆپا ئیراقێ دا هەیە و پلان بۆ هاتینە دانان، كەڤتنا تیمێ دبیت چەند ئەگەر هەبووینا ژوانا هێلانا ڕاهێنەر مەسعۆد میرالی و شاشیێن دادڤانان و ئەم ژی هەست ب بەرپرسیارەتیێ دكەین و نە ڕەڤینە و بارودوخێ دارایی یێ خراب ژی ل سەر حوكمەتا هەرێما كوردستانێ و ئەم نە شیاینە هەر ژ مەها چار مووچەیا وەربگرین لێ مە بۆ یاریزانان هەتا مەها شەش ژی یا بەرهەڤكری و دابیندكەین، ئەم شەڤ و رۆژ كاردكەین و سۆزدایە و كارەكێ باش هاتیە كرن بۆ وەرزێ بهێت كو گوهۆڕینێن باش هێنە كرن.
ژلایەكێ دووڤە د. عەبدوللا خۆیاكر بڕیاردایە مووچەیێ یاریزان 50% بهێتە بڕین بۆ ڤێ مەهێ ژبەر ئاستێ وان یێ لاواز، هیڤیدارین پشتەڤانییا تیما خوە د ڤێ دەمێ هەستیار دا بكەین، هیڤییا مە ئەوە د یاریێن بهێت یێن گرنگ ئەم بشێن ڤەگەڕینە سەركەڤتنان و سۆپاس بۆ خوەڕاگرییا جەماوەرێ مە یێ خۆشتڤی.
سیابەند عەگیدی ئەگەرێن خوسارەتیێ دیاركرن
د كۆنگرەیەكێ رۆژنامەڤانی یێ پشتی یاریێ دا سیابەند عەگید ستێرێ یانەیا دهۆك گۆت: ئەنجامەكێ زوور نەخۆش بوو و مە پێشبینییا ڤێ چەندێ نە دكر، لێ ئەم هاتینە دناڤ یاریێ دا هەروەكو ب كمێترییا هەشت یاریزانێن سەرەكی، ژبەر هەبوونا هنگاڤتنان، كارتێن سۆر و دوورئێخستن، بڕیارێن فدراسیۆنا فوتبۆلا ئیراقێ دژی یانەیا مە د دەمەكێ نە گۆنجایی دا هاتینە دەركرن، بۆ یارییا بهێت ب هیڤی نە ڤەگەڕین و قەرەبوو بكەین.
كوڕێن خابووری ڕیكۆردەكا نوو تۆماركر
ژلایێ خوەڤە تیما یانەیا زاخۆ بەردەوامە ل سەر ئەنجامێن باش و شیا سەركەڤتنا 20ێ د خولێ دا بینت، پشتی ب ئاست و ئەنجام سەركەڤتنەكا باش ل سەر یانەیا جەوییە یا بەغدایی بینت ب دو گۆلان بێ بەرانبەر، د یارییا واندا ئەوا ل یاریگەها زاخۆ یا نێڤدەولەتی هاتییە كرن، هەردو گۆلێن زاخۆ ژلایێ ستێرێ وێ ئەحمەد یاسین د خولەكێن 33 و 77 دا تۆماربكەت، بڤێ ئەنجامێن كوڕێن خابووری جهێ ل رێزا سێیێ موكمكرن ژ 20 سەركەڤتن، 10 وەكهەڤی و حەفت خوسارەتییان ب كۆمكرنا 70 خالان كو دبیتە ڕیكۆردەكا نوو یا تۆماركرنا خالان و جوداهی دناڤبەرا خوە و هەڤڕكا خوە یانەیا تەلەبە بكەتە حەفت خال ئەوا ل رێزا چارێ دهێت.
عەبدولغەنی شەهەد: ل سەر پلانێن خوە بەردەوامین
د كۆنگرەیەكێ رۆژنامەڤانی دا یێ پشتی ب دووماهی هاتنا یاریێ عەبدولغەنی شەهەد ڕاهێنەرێ یانەیا زاخۆ گۆت: سەركەڤتن دیارییە بۆ كارگێری و پشتەڤانێن دلسۆز یێن یانەیا زاخۆ، هەرچەندە ئەنجامێ ڤێ یاریێ چو كارتیكرن ل سەر ڕێزبەندییا مە نە دكر، لێ سەركەڤتن گەلەك یا گرنگ بوو و ب دەستڤەئینانا 70 خالان د خولێ دا تۆمارەكا نوو د دیرۆكا یانەیێ دا دهێتە نڤێسین، ئەم ل سەر پلانێن خوە بەردەوامین و پشتەڤانییا كارگێریێ و جەماوەری خالێن سەركەڤتنا پلانێن مەنە.
