بیانی یێن ل هەرێما كوردستانێ کاربکەن دێ فێری زمانێ كوردی هێنە کرن
هەولێر، قائید میرۆ:
كەسێن بیانی ل هەرێما كوردستانێ ب رێیا خۆلێن فێركرنێ فێری زمانێ كوردی دێ هێنە كرن و رێڤەبەرێ گشتیێ كار و دەستبەریا جڤاكی ژی دبێژیت: وەكی وەلاتێن جیهانێ كەسێن دهێنە هەرێما كوردستانێ پێدڤیە زمانێ كوردی بزانن.
دكتۆر عارف حیتۆ، رێڤەبەرێ گشتیێ كار و دەستەبەریا جڤاكی ل وەزارەتا كار و كاروبارێن جڤاكی یا حوكمەتا هەرێما كوردستانێ بۆ رۆژناما ئەڤرۆ دیار كر، سەرۆكێ حوكمەتێ نڤیسارەك ئاراستەی هەردو وەزارەتێن پەروەردە و خواندنا بلند كریە، داكو مامۆستا بهێنە دابینكرن بۆ وان وەلاتیێن بیانی ئەوێن دهێنە هەرێما كوردستانێ كار دكەن فێری زمانێ كوردی بكەن، چونكی سەنتەرێن وەزارەتا كار و كاروبارێن جڤاكی بەرهەڤن بۆ فێركرنا زمانێ كوردی، بەلێ پێدڤی ب مامۆستایێن زمانێ كوردی هەنە.
دكتۆر عارف حیتۆ گۆت: «ل پڕانیا وەلاتێن جیهانێ ئەو سیستەم هەیە هەر وەلاتیەكێ بچیتە وەلاتەكێ دی، پێدڤیە زمانێ وی وەلاتی بزانیت، لەوڕا ژی بڕیارا سەرۆكێ حوكمەتا هەرێما كوردستانێ د جهێ خوە دایە و دێ كار بۆ بجهئینانا بڕیارێ ژی كەین، بەلێ ئەم ل بەندا وەزیرێ پەروەردێ و خواندنا بلند داینە بۆ دابینكرنا مامۆستایان، بەری نوكە ژی مە پلانەكا وەسا هەبوویە، بەلێ پێدڤی ب بودجەی هەبوو».
