بیردوزا ئاینێ مروڤ بوونێ!
ئه‌ز ل وێ باوه‌رێ مه كه‌سه‌ك ژمه نینه سه‌رهاتیا چێكرنا ئاده‌می گوه لێ نه ببیت ژبه‌ر كو هه‌ر ئه‌ینی مه‌لا د گوتارا خوه دا دوو باره‌دكه‌ن، به‌لێ پا لێك تێگه‌هشتنا هه‌ر ئێك ژمه ژ یێ دن جودایه، ل پشت ڤێ سه‌رهاتیێ گه‌له‌ك تشتێن دن دهێنه د سه‌رێ مروڤی دا مینا گه‌ردون، چێكری، مروڤ ، هه‌بون، ژیان، مرن، قه‌ده‌ر،. .. . تا دگه‌هی یه ئاینی و ژیانا پاش مرنێ. وه‌كی خویا ل دور پرسا گه‌ردونی و چێكریێ وی نێرینێن جودا هه‌نه ل دویڤ باوه‌ریا هنده‌كا گه‌ردونێ چێكری نینه و هنده‌كێن دن هزردكه‌ن خودایه‌كێ هه‌ی! د هه‌مان ده‌م دا ژبو ڤێ مژارێ فه‌لسفه و بیردوزا ژی رولێ خوه د ناڤا مروڤان دا گێرایه هه‌ر ژ بیردوزا داروینی بگره یا كو جوداهیا خوه هه‌ی ل دور نه‌ژادێ مروڤا تا دگه‌هیه فه‌لسه‌فا ئیسلامێ، لێ یا من دخواست ل سه‌ر براوستم بیردوزا ئاینانه هه‌می ئاین د وه‌كهه‌ڤن كو نه‌ژادێ مروڤا دزڤریته ئاده‌می. ئانكو دێ زڤرینه خالا سه‌رهاتیا ئاده‌می ده‌مێ خودای گوتیه فریشتا: ئه‌ز دێ چێكریه‌كێ مروڤ دروست كه‌م! فریشتا ئێكسه‌ر گوتێ: چێكریه‌كی خوینێ برێژیت؟! ل دور چه‌وانیا زانینا فریشتا كو مروڤ دێ خوینێ رێژن! گه‌له‌ك پرس مانه هه‌لاویستی! لێ یا ئاین ڤه‌دگێرن ئه‌وه كو خودای خواستیه مروڤا چێكه‌ت دا وان تاقی بكه‌ت، ئانكو ئه‌ڤ ژیانه تاقیكرنه و نها ئه‌م یێ د وێ تاقیكرنێ دا و پاش مرنێ دێ ئه‌نجاما زانین! ده‌رباره‌ی تاقیكرنێ گه‌له‌ك پرسێن دن مانه ڤه‌شارتی! چه‌وانیا چێكرنا ئاده‌می و هه‌ڤركی یا وی دگه‌ل شه‌یتانی و هاتنا وی بو جیهانێ یا دیاره، لێ تشتێ گرنگ ئه‌و بوویه هه‌ر ژ هاتنا وی و په‌یدابونا مروڤا ئانكو زارویێن وی، خوین هاتیه رشتن و هه‌ڤركی دگه‌ل ئافراندنا جیهانامه دروست بویه، سه‌ده‌ما سه‌ره‌كی ژی بو جوداهیا بیرو باوه‌را دزڤریت! ده‌رباره‌ی پرسا ئه‌رێ ما خودای خواست بو جیهانه‌كێ چێكه‌ت خوین رشتن ساخله‌تێ وێ بیت ئه‌و پرس بو یا به‌رسڤ نه‌هاتیه دیتن! ل ڤێرێ مژار ده‌ست پێكر هه‌ر ژ خالا هاتنا مروڤا رشتنا خوینێ و ئاینی په‌یوه‌ندیه‌ك دگه‌لك گرێدا، لێ بوچی ئاین نه‌بوو سه‌ده‌ما راوستاندنا كوشتنێ ئه‌ڤه جهێ پرسیارێ یه، تا ئه‌ڤرۆ بێ رێژه ئاینێن هاتین بو مروڤان، لایه‌نگرێن هه‌ر ئاینه‌كی هزر دكه‌ن ئاینێ وان پێخه‌مه‌ت ئاشتی و مروڤاتیێ و ئازادكرنێ په‌یامه‌ك ئینایه بو جیهانێ، لێ دراستی دا هه‌ر ئاینه‌كی یا خواستی هزرا خو ب سه‌پینت ب هه‌ر بهانه‌كێ، ئه‌گه‌ر لجهێ په‌یامێن ئاینی یێن كو باس ل گونه‌هێ و خێرێ و حه‌لالی و حه‌رامی و جه‌هنه‌م و به‌حشت و مرنێ دكه‌ن، باس ل مروڤ مروڤاتی و پیروزیا مروڤا و ڤیانێ و رێزگرتنێ هاتبا كرن ئه‌رێ دا پێتڤی ب خو سه‌پاندنێ و تبشیرێ و فتوحات و (خیر لامه) و (شعب الله مختار) كه‌ت! هه‌ر ئاینه‌كێ هاتی یێ بویه هه‌لگرێ هه‌مان هزر، جارا مروڤ دكه‌ڤیته گومانێ ئه‌رێ ما خودای ژی مه‌رجێن خو هه‌نه تا من ب پارێزیت هه‌كه ئه بوچی یه ئه‌ز چێكریم؟ هه‌كه نه تاوانا ڤان هه‌می زارویا چی یه ئه‌ڤێن ژ برس و ترسێ دمرن بده‌ستێ مروڤا لبن په‌ردا ئاینی و جوداهیا بیرو باوه‌را! ما ئه‌وان چ تاوانا خو هه‌یه تاكو بكه‌ڤنه به‌ر تاقیكرنێ و بهێنه تاقیكرن پێخه‌مه‌ت وێ یه‌كێ پاش مرنێ بچنه به‌حه‌شتێ؟ ئه‌رێ وان چ په‌یوه‌ندی ب هه‌ڤركیێن ئاینی و خه‌له‌تیا ئاده‌می ڤه هه‌یه دا ئه‌ڤرو ئه‌و باجێ بده‌ن؟ گه‌ر ژ وان ب پرسی تو هزركه‌ی ئه‌و درازی بن نه‌ژادێ وا بو ئاده‌می ب زڤریت؟ یان د رازینه ئه‌و ببن خودان ئاینه‌ك؟ ئه‌ز چ ل ئاینه‌كی بكه‌م بو من باس ل ژیانا پاش مرنێ و ده‌ست كه‌فتیێن خو، پیروزیێن خو و حه‌لالی و حرامی بكه‌ت هه‌كه چ رێزێ ل مروڤبوونا من و گیانێ من نه‌گریت؟ ئه‌ز چ ل به‌حه‌شتێ بكه‌م هه‌كه نوكه‌یا من جه‌هنه‌م بیت؟ ل بن په‌ردا هنده پیروزیا ئه‌ز ببمه به‌نده، من چ په‌یوه‌ندی ب حه‌فت ته‌به‌قێن ئه‌سمانی و چێكرنا چیا و دارا ڤه هه‌یه هه‌كه ل بن په‌ردا غیب و معجیزا مێشكێ من هاتبیته سنوردار كرن.
