بیرهات دێ سترانەكا ئەڤینداریێ تۆمار كەت
ئەڤرۆ
ئەڤرۆ، شاهۆ فەرید:
سترانبێژ بیرهات مزیری د دیدارەكێ دا بۆ بەرپەرێ هونەریێ رۆژناما ئەڤرۆ گۆت: د ژیێ نەه سالیێ دا من دەست ب كارێ سترانگوتنێ كریە، حەزا ستران گۆتنێ من ژ بابێ خوە سترانبێژ (جەلال مزیری) وەرگرتیە، دگەل چوومە ئاهەنگ و شەهیانا و خوە فێركریە و ب هاریكاریا وی هاتیمە د ناڤ مەیدانا ستران گۆتنێ دا.
ناڤهاتی گۆت: نوكە ئەز كار د چێكرنا بەرهەمەكێ نوو دا دكەم كو بابەتێ ڤی بەرهەمی ل دۆر ئەڤینیێ، ئەڤ بەرهەمە ژ پەیڤ و ئاوازیێن سترانبێژ ( سەردار سەباح زاخویی)نە، هندی بشێم ب رێیا كارێ سترانگۆتنێ دێ خزمەتا حەز ژێكەرێن دەنگێ خوە كەم، پتر بۆ روونشتنێن تایبەت دهێمە داخوازكرن، سترانێن هونەرمەندێ خودێ ژێ ڕازی (عەبدولواحد زاخۆیی) ژ من داخواز دكەن، ئەڤە د دەمەكی دایە گەلەك یانێن شەڤان ژی داخوازا گۆتنا سترانان ژ من دكەن، بەلێ ئەز ل سەر ڤێ چەندێ ڕازی نابم.
