بیمه‌یا ساخله‌میێ ل هه‌رێمێ بۆ وه‌لاتیان دێ هێته دابینكرن
هه‌ولێر، قائید میرۆ:
وه‌زاره‌تا ساخله‌میێ مژوولی به‌رهه‌ڤكرنا پڕۆژه‌قانوونا بیما ساخله‌میێ یه بۆ وه‌لاتیێن هه‌رێما كوردستانێ و سه‌رۆكێ لژنا ساخله‌میێ ژی دبێژیت: مینا وه‌لاتێن جیهانێ هه‌موو وه‌لاتیه‌كێ هه‌رێما كوردستانێ دێ بیته خودان بیما ساخله‌میێ.
دكتۆر سه‌باح زێباری، سه‌رۆكێ لژنا ساخله‌میێ ل په‌رله‌مانێ كوردستانێ بۆ رۆژناما ئه‌ڤرۆ دیار كر، وه‌زاره‌تا ساخله‌میێ مژوولی به‌رهه‌ڤكرنا پڕۆژه‌قانوونا بیما ساخله‌میێ یه و گۆت: “پشتی پڕۆژه‌قانوون ته‌مام دبیت، ژلایێ په‌رله‌مانێ كوردستانێ ڤه دێ هێته په‌سه‌ندكرن، پڕۆژه‌قانوونا بیما ساخله‌میێ ئێكه ژ پڕۆژه‌قانوونێن هه‌ره گرنگ بۆ هه‌رێما كوردستانێ، چونكو پێنگاڤه‌كا باشه بۆ پێشڤه‌چوونا كه‌رتیێ ساخله‌میێ ل هه‌رێما كوردستانێ، نوكه ل پتریا وه‌لاتان بیما ساخله‌میێ هه‌یه و دێ ئاسانكاریێن زۆر بۆ وه‌لاتیان كه‌ت بۆ پێشكێشكرنا خزمه‌تگوزاریێن ساخله‌میێ”.
دكتۆرسه‌باح زێباری گۆتژی: “دابینكرنا بیما ساخله‌میێ دێ مینا هه‌موو وه‌لاتێن پێشكه‌فتی بیت بۆ پێشكێشكرنا خزمه‌تگوزاریێن كه‌رتێ ساخله‌میێ، لژنا ساخله‌میێ نوكه هه‌ماهه‌نگیێ دگه‌ل وه‌زاره‌تا ساخله‌میێ دكه‌ت؛ هه‌تا پڕۆژه‌یه‌كێ پێشكه‌فتی ل دۆر بیما ساخله‌میێ بهێته به‌رهه‌ڤرن، دیسا بۆچوونێن لژنا ساخله‌میێ ژی هاتینه‌وه‌رگرتن”.
