بێده‌را هه‌ستان
حسنی عه‌لی رێكانی
ئه‌ی دل قه‌بیناته ل ناڤ ڕكێ دا
په‌ریشان و بێزاره ژ ئازارا
چوو ئێدی ناڤه‌گه‌ڕه
خوه تێك نه‌ده ل دووڤ نه‌به‌زه
ده‌نگێ ته من دهه‌ژینه
ل ناڤ ده‌ریا خه‌ما بووم گه‌میڤان
پێلێن دژوار من دادپێچن
سه‌ر و سه‌ردا ل من بوونه گێژه‌ڤانك
هزر و خه‌یالێن من بژاله بوون
ل هه‌ر چركه و ساته‌كێ سه‌د ئاواز
دسه‌رێ من دا بوونه جونی
رۆژێن گوڕ من دشه‌وتینه
شه‌ڤ ل من بوونه تاریستان
رۆناهی ل من كز بوو
به‌رپێن من شلقین!
ژ ته‌ڤ لاڤه دۆرپێچ كریمه
هه‌ناسه‌یه‌ك دناڤ سینگێ من دا ب كوته‌كی یه
ل وارێ من و ته هشه‌كه سالی یه
ده‌م بۆ ده‌می پتر ئالوزی یه
عه‌ورێ فرتی بارانا خوه‌شیێ ل مه نابارینه
چو په‌ناگه‌ه نه‌ما لێ ڤه‌حه‌وین
په‌یڤ هێدی هێدی ژ سه‌مایێ سست دبه
دبنه ئاشۆپه‌ك بۆ گوهان
هه‌موو خه‌ون وندا دبن
بوونه له‌یلان ل به‌رچاڤان
برینێن كوور بێ ده‌رمانن
بێده‌را هه‌ستان من دهنجنه!
ما گونه‌ها من چییه؟
چما ئیرو هۆسا به‌رهنگاری من بوونه؟
تنێ ئه‌ز ل ڤێ ژینێ ب له‌یزم
به‌ریكانا ته هه‌ر دبازنێ دا نا به
ب چو ئاوا ده‌ستا قه‌ت نا داهێلم
یاریكه‌ره‌كێ سه‌ره‌كی مه
ب چو به‌رپێكان پاشگه‌زنابم
هه‌ردمینم ل سه‌ر پێیان
ئێدی ده‌ری بۆ ته ڤه‌دكه‌م
غارده سواری هه‌سپی ببه
خووه بازده ل ناڤ مێرگا
كوڤانا خوه برێژه.
