بێكاری ئاریشا سەرەكی یا لاوێن كوردستانێ یە
هەرهین محەمەد:
بەرپرسێ مالا لاوان سەر ب ئێكەتیا لاوان ڤە راگەهاند، بێكاری ئاریشا سەرەكی یا لاوانە و هەموو دەمان مە بزاڤكریە ب رێیا ڤەكرنا خولێن پێشەیی یێن جودا جودا گەنج بهێتە پرچەكرن و بیتە خودان پێشە و دەرگەهەك بۆ ڤەدیتنا دەلیڤێن كاری، دا كو بشێت بەردەوامیێ ب ژیانێ بدەت.
كاوار رەسول نێروەی، بەرپرسێ مالا لاوان بۆ پەرپەرێ گەنجان یێ رۆژنامەیا ئەڤرۆ گۆت: ئەو پرۆژە چالاكیێن ل سالا بوری مە ئەنجام داین پتر ژ 40 چالاكیێن جورا و جوربووینە، ئەو چالاكیە ژی گرێدای ئاریشە و داخوازێن لاوان و بێ كاریێ و ژینگەه و نشتیمانی و پێگەهاندنا لاوان و خولێن پێشەیی كو لاوێن مە بنە خودان پیشە و ئەو پیشە ببیتە دەرگەهەك بۆ ڤەدیتنا دەلیڤێن كاری و پرچەكرنا لاوان وەكو ئەركێ مە، مە د هەموو رێكێن جودا دا بزاڤكرینە خزمەتا لاوێن خوە بكەین.
زێدەتر گۆت: د سالا بوری دا سەرەرای هەموو قەیران و نەخوشێن ب سەر هەرێما كوردستانێ دا هاتین و كارتێكرنا خوە ل سەر هەموو سەكتەر و لایەنێن حزبی و حكومەتێ هەبوو، بەلێ ژلایێ مە ڤە هەر بەردەوامی هەبوویە و بەردەوام مە بزاڤكرینە خوە ل داخازی و پێدڤی و خەم و ئاریشەیێن لاوان بكەینە خودان و ژ بەر ڤێ چەندێ ئەم شیاینە د سالا بوری دا ئەنجام بدەین و د سالا نوی ژی دا كومەكا بەرنامە و پلانێن باش یێن جودان و ل دووڤ پێدڤیا لاوی د رێدانە و ل نێزیك ئەو ژی دێ هێنە ئەنجامدان.
بەرپرسێ مالا لاوان ئەو چەندە ژی گۆت: بێكاری ئێك ژ ئاریشێن سەرەكی یێن لاوانە، هەموو دەمان مە بزاڤكریە لاوی پرچەك بكەین و بینە لینكەك دناڤبەرا كارخوازی و خودانكاری و ل گەل دەستبكاربوونا من وەكو بەرپرسێ مالا لاوان مە دوو كوربەند كرینە، كوربەندێ ئێكێ و دووێ، د كۆربەندێ ئێكێ دا یێ بەری دوو سالان ب هەلكەفتا 18 شواتێ مە كوربەندەك چێكر ل سەر كەلتور بهاكرن و جوانكرنا كاری و كومەكا رەهەندێن جودا وەكو سیاسی و ئابوری و جڤاكی و پەروەردەیی و قانونی و ئاینی و مە ئاریشە دەستنیشانكریە و چارەسەری ژلایێ كەسانێن بسپور ڤە دیتیە و دەرئەنجامێن وێ ژی مە راپرسی كربوو و ئەنجام ژی مە داینە لایەنێن پەیوەندیدار كو هاریكار بن د ڤان رەهەندان دا و كار ل سەر هندێ بكەن كاری ل دەڤ گەنجێ مە ب بها بێخن.
د سالا بوری دا كوربەندێ دووێ یێ مالا لاوان مە پێشانگەهەكا دەلیڤێن كاری ڤەكر و پتر ژ 1240 لاوێن كور و كچ پشكداری كربوو، د وێ پێشانگەهێ دا نێزیكی 50 كومپانی و جهێن بازرگانی پشكداربوون و 42 دەلیڤێن كاری د وێ پێشانگەهێ دا بۆ لاوێن مە هاتنە دیتن.
زێدەتر گۆت: د سالا بوری شازدە خولێن جودا جودا یێن پێشەی مە ڤەكرینە و نێزیكی 755 گەنجێن كور و كچ پشكداری كربوو ژبۆ هندێ گەنجێ مە بهێتە پرچەككرن د هەموو لایان دا و شارەزایێن جورەو جور ل دەڤ گەنجان پەیدا بكەین و ببیتە دەرگەهەك ژ بۆ ڤەدیتنا دەلیڤێن كاری، بەلێ مە دووڤچوون نەكریە، كا لاوێ مە چەند دەلیڤێن كاری بۆ خوە دیتینە و هەردو رەگەز بزاڤێ دكەن خوە فێری كاری بكەن، بەلێ ل دووڤ داتایان ئەڤ سالە و ل سالا بوری پتر كچ بزاڤێ دكەن خوە دهاڤێژنە خولان و كچ گەلەك حەز ژ خولێن مێكئاپ و دروارێ و كارێن دەستی و چێكرنا خوارنان دكەن و گەلەك جاران ئەم بۆچوونا وان وەردگرین كا جارێن بهێت ئەم بۆ هەوە كیژ خولێ ڤەكەین.
