بێكه‌س قادر: ناكۆكی لسه‌ر رێڤه‌چوونا هه‌لبژارتنێن هه‌رێما كوردستانێ یێن هه‌ین
هه‌ولێر، قائید میرۆ
بڕیاره ل دوماهیا ئه‌ڤساله پڕۆسا هه‌لبژارتنێن په‌رله‌مانێ كوردستانێ بهێنه ئه‌نجامدان و به‌رپرسه‌كێ حزبا زه‌حمه‌تكێشان ژی ب دوور دزانیت لایه‌نێن سیاسی بگه‌هنه رێككه‌فتنێ لسه‌ر ژڤانێ هه‌لبژارتنان و دبێژیت، نابیت راستڤه‌كرنا قانوونا هه‌لبژارتنان بكه‌نه به‌هانه‌یه‌ك بۆ پاشخستنا هه‌لبژارتنان.
بێكه‌س قادر، ئه‌ندامێ مه‌كته‌با سیاسی یا حزبا زه‌حمه‌تكێشێن كوردستانێ بۆ رۆژناما (ئه‌ڤرۆ) گۆت” ده‌مێ قانوونیێ كۆمسیۆنا هه‌لبژارتنێن هه‌رێما كوردستانێ ب سه‌رڤه‌چوویه و پێدڤیه دوباره كۆمسیۆن بهێته كاراكرن، یا فه‌ره ب گۆره‌ی ناڤێ خوه كۆمسیۆنا هه‌لبژارتنان یا سه‌ربخوه بیت، ئانكو كۆمسیۆن ده‌زگه‌هێ سه‌ربه‌خوه د بیت و ئه‌گه‌ر لسه‌ر بنه‌مایێ حزبی ژی بهێته دانان هه‌موو لایه‌نێن ناڤا په‌رله‌مانی و ده‌رڤه‌ی په‌رله‌مانی ژی تێدا پشكدار ببن، دگه‌ل ڤێ چه‌ندێ ژی نابیت كۆمسیۆن سه‌ر ب لایه‌نێن سیاسی ڤه بیت و سه‌ربخوه‌یا خۆ دڤێت بپارێزیت و ب پیشه‌یی كار بكه‌ت بۆ رێڤه‌برنا پڕۆسا هه‌لبژارتنێن هه‌رێما كوردستانێ، نابیت بابه‌تێ كۆمسیۆنێ ژی ببیته به‌هانه بۆ پاشخستنا هه‌لبژارتنێن په‌رله‌مانێ كوردستانێ، كو بڕیاره ل دوماهیا هه‌یڤا ئه‌یلوولا ئه‌ڤساله بهێنه ئه‌نجامدان، ئه‌م باوه‌رین چو به‌هانه‌یه‌ك ل هه‌رێما كوردستانێ نینه بۆ پاشخستنا هه‌لبژارتنان و دڤێت د ده‌مێ خۆ یێ قانوونی دا پڕۆسا هه‌لبژارتنان بهێته ئه‌نجامدان”.
ئاماژه‌كر” نوكه ده‌م نه‌مایه بۆ راستڤه‌كرنا قانوونا هه‌لبژارتنان، چونكه ئه‌م یێ نێزیكی ده‌مێ هه‌لبژارتنان دبین و ده‌مێ پێدڤی لبه‌رده‌ست نینه قانوون بهێته راستڤه‌كرن و ل دۆر چاوانیا رێڤه‌چوونا پڕۆسا هه‌لبژارتنان، ب دیتنا من هه‌كه به‌رنامه‌یه‌كێ رژد ل دۆر راستڤه‌كرنا قانوونا هه‌لبژارتنان هه‌با، پێدڤی بو به‌ری دو سالان قانوون هاتبا راستڤه‌كرن، نابیت راستڤه‌كرنا قانوونێ تنێ مه‌ره‌م بۆ راستڤه‌كرنێ بیت، به‌رۆڤاژی ل ئیراقێ ژی قانوونا هه‌لبژارتنان هاته راستڤه‌كرن و هه‌تا نوكه كێماسیێن راستڤه‌كرنێ دیارن، ناكۆكی لسه‌ر راستڤه‌كرنا قانوونا هه‌لبژارتنان نینه دێ چاوا هه‌لبژارتن هێنه ب رێڤه‌برن، به‌لكو یا فه‌ر ئه‌ڤه پڕۆسه‌كا زه‌لال و شه‌فاف بهێته ب رێڤه‌برن،چونكه هه‌لبژارتنه‌كا زه‌لال دێ زێده‌تر باوه‌ریێ بۆ خه‌لكێ كوردستانێ و ده‌نگده‌ران په‌یداكه‌ت، لیستا ده‌نگده‌ران بهێته پاقژكرن ئه‌ڤه ئاریشا سه‌ره‌كی یه ل هه‌رێما كوردستانێ نه‌كو راستڤه‌كرنا قانوونێ”.
بێكه‌س قادر گۆت ژی” ناكۆكیێن زۆر د ناڤبه‌را لایه‌نێن سیاسی هدا یێن هه‌ین لدۆر ب رێڤه‌چوونا هه‌لبژارتنان، ئانكو سازانه‌كا گشتی نینه ل دۆر چاوانیا ئه‌نجامدانا هه‌لبژارتنان، ئه‌ز بینم جوداهی هه‌یه دناڤبه‌را بۆچوونێن ئالیێن سیاسی هندی خالێن ناكۆكیێن هه‌ین، خالێن نێزیك نینن، له‌وڕا ئه‌ز یێ گه‌شبین نینم ئالیێن سیاسی بگه‌هنه رێككه‌فتنێ، ئه‌ڤه‌ژی دێ بیته ئه‌گه‌رێ پاشخستنا هه‌لبژارتنان، كو هیڤیدارین ئه‌ڤه روونه‌ده‌ت و هه‌لبژارتن بهێنه ئه‌نجامدان”.
