بێهنا شەڤێ ئەز خوارم

بەهزاد بەهرام

هەر شەڤ
مێڤانێ شەڤێ مە
گەلەك زوی
ئەز هیبوومە شەڤێ
تو دزانی بۆچی؟
ژبەركۆ
رەنگێ پرچا تە
مینا تاریاتیا شەڤێ یە
دەستێن خوە دناڤ تاریاتیا شەڤێدا
دئینم و دبەم
كا چەوا من دناڤ داڤێن پرچا تەدا
دئینان و دبرن
وێ چریسكێ
دگۆتە چرفێنا چریسكا دی
هەستە جهێ من بكە
ئاها وەسا دناڤبەرا شەڤێ و دەستێن من دا
تەیسۆكان
ژ ڤی ئالی بۆ ئالێ دی پیاسە دكرن
بێهنا شەڤێ ئەز خوارم
هەر وەك بێهنا پرچا تەیە
هەر شەڤ
مێڤانێ شەڤێ مە
گەلەك زوی
ئەز فێربوومە شەڤێ
تو دزانی بۆچی؟
ژبەركۆ
سیتافكا تە
دناڤ تاریاتیا شەڤێدا
رەنگ ڤەددەت
هەر شەڤ
دەما من شەڤ هەمبێز كربا
سیتافكا تە
ئێكسەر خوە د من وەر دكر
توند ئەز دگڤاشتم
ئەو شەڤا من
سیتافكا تە هەمبێز كربا
شەڤێ ئەز و سیتافك
دناڤ خوەدا هەمبێز دكرین
بێهنا شەڤێ ئەز خوارم
هەر وەك بێهنا لەشێ تەیە.

کۆمێنتا تە