بێوار بۆسه‌لی: سه‌ركه‌فتنا ئه‌ڤرۆ دێ مه ژ رێزبه‌ندیا مه‌ترسیێ دوورئێخیت
ئه‌ڤرۆ، عه‌لی حاجی:
د داخویانیه‌كێ دا سه‌رپه‌رشتێ تیما ته‌پا پێی یا یانا زاخۆ ئه‌وا پشكدار د خولا پلا نایابا كوردستانێ دا دیاركر پشتی بورینا سێ یاریێن خولێ تیما وان شیایه گۆلا خوه پارێزیت و حه‌فت خالان كۆمبكه‌ن و سه‌ركه‌فتنا ئه‌ڤرۆ ل سه‌ر ئارارات دێ ژ رێزبه‌ندیا مه‌ترسیێ دوورئێخیت.
زێده‌تر بێوار بۆسه‌لی بۆ رۆژناما ئه‌ڤرۆ گوت: هه‌تا نوكه مه 50% مانا خوه د خولا پلا نایاب دا پاراستی یه ئه‌ڤچه‌نده ژی پشتی پێنچ یاریزانێن مه یێن تیما زاخۆ د خولا ئیراقێ دا په‌یوه‌ندی ب تیما كوردستانێ كری و هیڤیێن مانا مه گه‌شتر لێكرن پشتی كو ل رێزێن دووماهیێ و داكه‌فتنێ بۆ پلا ئێك ل سه‌ر هه‌بوون، سه‌رباری هێشتا گه‌ڤێن داكه‌فتنێ ماینه و ژ سێ یاریان دو سه‌ركه‌فتنا تۆماربكه‌ین دێ مانا خوه مسۆگه‌ر كه‌ین و ژلایه‌كه‌كێ دووڤه سه‌ركه‌فتنا ئه‌ڤرۆ ل سه‌ر ئارارات و خوساره‌تیا هه‌ولێر دێ تیما مه ژ رێزبه‌ندیا مه‌ترسیێ دووركه‌ڤیت و مانا خوه پارێزیت لێ یا گرنگ هه‌موو یاریزان هه‌ست ب به‌رپرسیاره‌تیێ دكه‌ن و سه‌ركه‌فتنێن یاریێن بوری ل گه‌ل تیمێن بهێز به‌لگه‌یه ل سه‌ر ڤێ یه‌كێ.
ناڤهاتی ئه‌وچه‌نده ژی دیاركر ده‌سته‌یا كارگێریا یانێ گرنگیه‌كا مه‌زن ب تیمێ دكه‌ت و هه‌موو پشته‌ڤانی و هاریكاری بۆ ته‌رخانكرینه و دووڤچوونه‌كا به‌رده‌وام دهێته كرن ژ هه‌موو لایه‌ناڤه و هه‌ر یاریزانه‌كێ پێدڤی بیت ژ تیما مه یا خولا ئیراقێ بۆ تیما كوردستانێ هاتینه به‌رهه‌ڤكرن سه‌رباری گڤاشتنێن هه‌ردو خولا لێ یا دبه‌رژوه‌ندیا ناڤێ زاخۆ دا بیت دێ هێته كرن.
