بێوار عزه‌ت: پێدڤیه هونه‌رمه‌ند به‌رده‌وام داهێنان بكه‌ت
ئه‌ڤرۆ، سولین سلێمان:
هونه‌رمه‌ندێ كورد بێوار عزه‌ت، د ده‌مێ بوری دا چه‌ندین به‌رهه‌مێن جوان پێشكێشی حه‌ز ژێكه‌رێن ده‌نگێ خوه كرینه ب تایبه‌تی ل ڤێ دووماهیێ چه‌ندین سترانێن خوه ب شێوه‌یێ ڤیدیۆكلیپ به‌لاڤكرینه.
بێواری د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دیار كر كو ژ سالا ٢٠٠٢ وی ده‌ست ب كارێ هونه‌ری كریه و كلیپا خوه یا ئێكێ بناێ (مه‌رجان مه‌رجانێ) ل سالا ٢٠٠٣ به‌لاڤكربوو و دانگڤه‌دانه‌كا گه‌له‌ك باش ب ده‌ستخوه‌ڤه ئینابوو و گۆت: “هه‌تا نوكه ئه‌ز خودانێ ئه‌لبۆمه‌كێ مه زێده‌تر ژ ١٣ ڤیدیۆكلیپ ژی من هه‌نه، ئێك ژ وان ئاریشێن هونه‌ری كو د وه‌لاتێ مه دا هه‌نه ئه‌وه كو هونه‌رمه‌ندی دگه‌ل سترانبێژان جودا ناكه‌ن ئه‌ڤ چه‌نده بوویه ئه‌گه‌ره‌ك كو هونه‌رێ كوردی پاشڤه‌بچیت”.
ناڤهاتی خویا كر كو ژبلی سترانگۆتنێ ئاواز و هنده‌ك جاران ژی تێكستا دنڤیسیت، لێ نوكه مژوولی بازرگانیه‌كا تایبه‌ته و ئه‌و ب خوه برێڤه‌دبه‌ت و گۆت: “ل رۆژێن بۆری من نووترین ئه‌لبۆما خوه به‌لاڤكر كو یا پێكهاتیبوو ژ كۆمه‌كا سترانێن ب هه‌ست و نوكه حه‌زژێكه‌رێن ده‌نگێ من دشێن گوهداریا ڤان سترانان بكه‌ن”.
