بێوژدانی و دارێ ژ بەهەشتێ هاتی
سەیفوللا محەمەد
ب دیتنا من، وژدان ئێك ژ گرنگترین ئەندامێن هەستپێكرنێ یە د ناخێ مرۆڤی دا، بۆ مرۆڤی وەكو زەنگەكا هوشداریێ یە دەما بچویكترین شاشیێ دكەت، لێ ڕێژەیا وێ ل دەف كەسەكی بۆ كەسەك دی جودایە. ئەڤە ژی وەكو هەستكرنا دیتنێ یان گوهلێبینێ ل دەف هەمی كەسان وەكو ئێك نینە، وژدان ژی ل دەف هندەك كەسان ب هێزە و ل دەف هندەكان كێم و لاوازە، چێدبیت ل سەر پەروەردەكرنێ ژی بمینیت، كا چەند هاتیە پەروەردەكرن و چەند كارتێكرنا خوە هەبوویە. ئەڤجا ئەڤ ڕێژەیا وژدانێ ل دەف هندەك كەسان د ئاستەك بلند دا دمینیت و د گۆتن و كریارێن خوەدا دبنە جهێ باوەریێ، چونكو وژدانا وی ڕێ نادەت ب گۆتن یان ب كریان زیانێ بگەهینیت یێ بەرانبەر.
بەرڤاژییا ڤێ ژی، ئەگەر ڕێژەیا وژدانێ ل دەف كەسەكی د ئاستەك نزم دا بیت، هیچ ڕێگری بۆ نابیت زیانێ بگەهینیت دەوروبەران، چاڤێن وی بتنێ ل بەرژەوەندی و سودبەخشییا وی یە، ئەگەر چەند ل سەر حسابا خەلكەكی ژی بیت. ئەڤجا بێوژدانییا وی بەرێ وی ددەت ڕێكێن سەختەكاری و فێلبازی و خاپاندنێ، دەمێ ئەڤ چەندە د كارەكی بچویك دا ژی دهێتەكرن، دبیتە ڕێخوەشكەر بۆ كارێن مەزن و بەرفرەهتر، هەتا دگەهیتە تاوانێن ژبۆ ژناڤبرنا مرۆڤان ژ بۆ بدەستڤەئینانا تشتەكی بێ بها و نە بەركەتی.
نوكە ئەڤ بێوژدانی یە وەكو ئێشەكێ د ناڤ جڤاكا مە دا یا بەربەلاڤ بووی، گەلەك مەترسیدارە و خەلك ب گشتی قوربانییا ڤێ چەندێ ددەت و زیانێن مەزن دبینن. یا بەرچاڤە كو ئەڤ بێوژدانییە گەلەك زێدەبوویە و ب دەهان نموونە یێن هەین، هەر وەكو ڕۆژانە ئەم دبینین و دبهیسین كو ژ لایێ لیژنەیێن چاڤدێرییا بازرگانی ڤە ل هەمی باژێڕان ڕۆژانە چەندین تەنێن كەرەستەیێن دەم بسەرڤەچووی دەستەسەر دكەن، چ ئاهێن خوارن و ڤەخوارنێ و چ دەرمانێن سەختە و هەتا د گەهیتە گاز و ڕوون و پانزینێ و هەر پێدڤییەكا دی. ئەڤ هەمی سەختەكاری ژ لایێ كەسێن بێوژدانڤە دهێنە كرن و مەترسییەكا مەزن د ئێخیتە سەر ژیانا خەلكی. ب دیتنا من ژبۆ بنبڕكرنا ڤێ چەندێ، پێدڤییە لایەنێن پەیوەندیدار پتر چاڤدێرییا ڤان بێوژدانا بكەن و سزایێن توندتر و مەزنتر بدەن بەر وان، وەكو زیندانكرنا چەندین سالان و ژێ وەرگرتنا كۆژمەیەكی زێدە یێ پارەی و بەلاڤكرنا ناڤ و جهـ و سەختەكارییا وان د كەنالێن ڕاگەهاندنێ دا، داكو ئەڤ كار ببیتە جهێ مەترسیێ، ئێدی كەس بستەه نەكەت خوە تووش بكەت، چونكو نە ب ترساندنێ بیت، چ چارەیێن دی بۆ ڤان كەسان نابیت، هەر ژ كەڤندا ژی هاتیە گۆتن (دارێ ترسێ ژ بەهەشتێ هاتییە)، ئانكو بلا ب دارێ ترسێ بێنە پەروەردەكرن.
