بێی حەزا من ناڤێ من ل پشكا رۆژنامەڤانی دەركەفت
سندس سالح سلێڤانەیی:
مەدیاكار(سەلام مشیر) كو خەلكێ گوندێ شەرمنە ل دەڤەرا ئاكرێ، د دیدارەكێ دا بۆ رۆژنامەیا ئەڤرۆ گۆت: ل سالا 2011 من دەست ب كارێ راگەهاندنێ كریە و ل 2014 بوویمە پەیامنێر ل قەزایێن ئاكرێ و بەردەڕەش و شێخان و بارزان، ل 2023 گرێبەستا من ل گەل كەنالێ وار ب دووماهی هات و نوكە پەیامنێرێ (ئاڤا میدیا) مە..
هەروەسا گۆت: پشتی من پولا 12 ب دووماهی ئینای بێی حەزا من ناڤێ من ل پشكا رۆژنامەڤانی ل پەیمانگەها تەكنیكی و كارگێڕی دهۆك هاتە وەرگرتن، پاشی ل قوناعا دویێ حەزا كاركرنا پتر بۆ من چێبوو، لەورا هەتا نوكە ل سەر وێ حەزێ و ب هەستەكێ بلند بەردەوامیێ ب كارێ خوە یێ راگەهاندنێ ددەم، هەلبەت نوكە پێشكەفتنا تەكنەلۆژیایێ كارتێكرن ل راگەهاندنێ هەبوویە و ئاستەنگا من دیتی د دەمێ كاری دا نە شارەزاییا من بوو د زمانێ عەرەبی دا، چنكو ل سەر دەمێ شەڕێ داعش پێدڤی بوو من باشتر زمانێ عەرەبی زانیبا و نوكە ژی هەر نووچەیەكێ دگەهیتە من هەتا ئەز ب دروستی پشتراست نەكەم و كەسێن باوەرپێكری بۆ من نەبێژن ئەز وی نووچەی بەلاڤ ناكەم.
