بێی كەفتن مرۆڤ ب سەرناكەڤیت
هێلین سالم:
هەلین، كچەكا باژێرێ دهۆكێ یە، خودانا دوكانەكا گولایە، د دیدارەكێ دا بۆ رۆژنامەیا ئەڤرۆ دبێژیت: مە هەموویان هزرێن جوان یێن هەین و ئەم هەموو دشێین جوان هزربكەین و بكەینە كریار، بتنێ ل سەرمە پێدڤیە بێ ل دووف هزر و هیڤیێن خوە بچین و بێ راوەستیان.
هەروەسا گۆت: حەزا من بۆ ڤەكرنا دوكانا گولان یا بەری چەندین سالان بوو، من هیڤی هەبوون جارەكێ گولەكێ پێشكێشی خەلكی بكەم و ببمە ئەگەرێ خۆشیەكێ دناڤ دلان دا، لێ هەكە تۆ دەستان ژ هیڤیێن خوە بەردەی چو خۆشیان نابینی، دڤێت ئەم ئافرەت د خۆڕاگرن دا ئاستەنگ نەبە رێگر بۆ خۆشیا ژیانێ، بۆ هەر كارەكی دێ ئاستەنگ و زەحمەتی هەبن، هەروەسا ل دەستپێكێ دێ ئاستەنگ و كەفتن هەبن، ئانكو بێی كەفتن ئەم ب سەرناكەڤیت، بۆ زانین پشتی ڤەكرنا ڤێ دوكانێ ئەز پتر یا ئارام و دلخۆش بوویم و هەر دەمێ كەسەك دهێت داخوازا دەستكەكێ گولان ژمن بكەت ل وی دەمی ژیان بۆ من گەلەكا ئارام و خۆشە.
