بێی مـۆلـەتا دادگـه‌هـێ نابیت ڤـیدیۆیا چ روودانان بهێته به‌لاڤكـرن
هه‌ولێر، قائید میرۆ:
بسپۆره‌كێ تاوانناسیێ بو رۆژنامەیا ئەڤرۆ دیار کر کو به‌لاڤكرنا ڤیدیۆ و وێنه و ده‌نگێ وه‌لاتیان ل ده‌مێ په‌یدابوونا روودانان قه‌ده‌غه‌یه و گۆت؛ نابیت هیچ ماله‌ك و جهه‌كێ بازرگانی بێی وه‌رگرتنا مۆله‌تا دادوه‌ری ڤیدیۆیێن ب رێیا كامیره‌یێن چاڤدێریێ دهێنه گرتن بده‌نه تورێن جڤاکی و ده‌زگه‌هێن راگه‌هاندنێ.
عه‌لی سه‌لیم بابان، بسپۆرێ تاوانناسیێ بۆ رۆژناما ئه‌ڤرۆ دیار كر، ده‌مێ روودانه‌ك دهێته روودان رەنگە زۆر نهێنی تێدا هه‌بن، له‌ورا نابیت زانیاری و هویركاریێن روودانێ به‌ری دادگه‌هێ بهێنه به‌لاڤكرن، چونكه به‌ری ڤه‌كۆلینیێ درست نینه ڤیدیۆ بهێته به‌لاڤكرن.
بابان دیار کر ژی کو مخابن دیارده‌یه‌كا نه هه‌ژی له هەرێما كوردستانێ په‌یدابوویه، ئەوژی ده‌مێ روودانه‌ك په‌یدا دبیت دكانه‌ك یان ماله‌كا نێزیك روودانێ ئێكسه‌ر ڤیدیۆیێ به‌لاڤ دكه‌ن یانژی دده‌نه ده‌زگه‌هێن راگه‌هاندنێ و تۆڕێن جڤاکی ئه‌ڤه‌ژی به‌رۆڤاژی قانوونێ یه و ب هیچ شێوه‌یه‌كی نابیت بێی وه‌رگرتنا مۆله‌تا دادوه‌ری ڤیدیۆ یان وێنه و ده‌نگ بهێنه به‌لاڤكرن و گۆت؛ له‌وانه‌یه ئاریشه مه‌زنتر لێبهێت و كاریگه‌ری لسه‌ر رێكارێن قانوونی ژی هه‌بیت.
عه‌لی سه‌لیم بابان دیار کر کو پێدڤیه داخوازكارێ گشتی هه‌موو وه‌لاتیان و ده‌زگه‌هێن راگه‌هاندنێ ئاگه‌هدار بكه‌ت لگوره‌ی قانوونێ نابیت ڤیدیۆ بهێنه به‌لاڤكرن و نابیت ده‌زگه‌هێن راگه‌هاندنێ جهێ تاوانێ نیشا خه‌لكی بده‌ن، لگوره‌ی قانوونا خراب بكارئینانا ئامیرێن په‌یوه‌ندیان بۆ كه‌سێ نینه وێنه و ڤیدیۆیێن كه‌سه‌كێ دی به‌لاڤ بكه‌ت بێی وه‌رگرتنا مۆله‌تا دادگه‌هێ.
بسپۆرێ تاوانناسیێ دا زانین کو هه‌ر كه‌سه‌كێ تووشی روودانه‌كێ یان ئاریشه‌كێ ببیت و وێنه و ڤیدیۆیێن وی بهێنه به‌لاڤكرن دشێت سكالایێ تۆمار بكه‌ت لسه‌ر ئه‌ڤی لایه‌نێ وێنه و ڤیدیۆ به‌لاڤكری و داخوازا مافێ خۆ بكه‌ت، ژبه‌ركو كه‌سێ رێك نه‌دایێ ڤیدیۆیێ به‌لاڤ بكه‌ت و گوت؛ مه چه‌ندین باده‌ك هه‌بووینه ل دادگه‌هێ هه‌تا دادوه‌ری بڕیار ده‌رنه‌كری نه‌شیاینه سه‌ربخۆ داخوازا ڤیدیۆیێ بكه‌ین بۆ بكارئینانێ وه‌كی به‌لگه، وه‌لاتی ژی پێدڤیه د هشیار بن هه‌ر كه‌سه‌كێ داخواز كر ڤیدیۆیێ بده‌تێ نابیت بێی بڕیارا دادوه‌ری ڤیدیۆ بهێته به‌لاڤكرن و بۆ كه‌سێ ژی بهێته هنارتن.
