بێی پشکـداریا کـوردان سـووریایەک نوو نـاهێتە ئاڤـا کـرن
ئەنجوومەنێ نشتیمانی یێ کوردی ل سووریێ دیار دکەت، دڤێت حوکمەتا نها یا سووریێ ل گەل کوردان دەست ب دانوستاندنان بکەت، هەکە شام کارەکێ وەسا نەکەت و پرسا کوردی ل سووریێ نەهێتە چارەسەرکرن دێ سووریێ تووشی قەیرانەکا مەزن بیت.
ئەنجوومەنێ نشتیمانی یێ کوردی ل سووریێ د داخویانیەکێ دا دیار کر، رەوشا سووریێ گەلەک هەستیارە و دڤێت کار بۆ چارەسەرکرنا پرسێن نها یین سووریێ بهێنە کرن، ب تایبەتی ژی گرنگە نها شام ل گەل نوونەرێن کوردان دەست ب دانوستاندنان بکەت و پرسا کوردی و پرسێن دی بهێنە چارەسەرکرن، مخابن هەلوەستێ نها یێ شامێ ل هەمبەر کوردان باش نینە، سیاسەتا نها یا شام ل هەمبەر کوردان برێڤە دبەت دێ ئەنجام خوە یێن خراب هەبن، گرنگە شام ل گۆر راستیێن هەی سیاسەتێ بکەت و گرنگە د زووترین دەم دا دانوستاندن د ناڤبەرا شاندێ کوردی و شامێ دا دەستپێ بکەن.
ئەنجوومەنێ نشتیمانی یێ کوردی ل سووریێ د پشکەکا دی یا داخویانیا خوە دا ئەو یەک ژی دیار کریە، بێی کوردان سووریا نوو ناهێتە ئاڤاکرن، دڤێت ئیرادەیا گەلێ کورد ل سووریێ بهێتە قەبوول کرن، دڤێت شام ل گەل کوردان پرسێن هەی چارەسەر بکەت، سیاسەتا نها یا شامێ خزمەتا پاشەرۆژا سووریێ ژی ناکەت، پێدڤیا سووریێ ب گوهۆڕینێن مەزن هەیە، دڤێت دەولەتا سووریێ ژ نوو ڤە بهێتە ئاڤاکرن و گرنگە کورد ژی د ئاڤاکرنا دەولەتا نوو یا سووریێ دا پشکدار بن، مخابن سیاسەتا نها یا شامێ راست نینە، دوورخستنا کوردان ژ ئاڤاکرنا دەولەتا نوو یا سووریێ خزمەتا پاشەرۆژا سووریێ ناکەت و دێ بیتە ئەگەرێ روودانا ئاریشەیێن گەلەک مەزن، ئاشکرایە بێی کوردان نە پرسێن نها ل سووریێ چارەسەر دبن و نە ژی سووریێ دشێت ببیتە وەلاتەک دیموکراتی و وەلاتێن جیهانێ ژی سووریایەک وەسا قەبوول ناکەن، چونکی دێ هەردەم د ناڤ ئاریشە و قەیرانان دا بیت.
ئەنەکەسێ ئەو یەک ژی دیار کریە، هێزێن سیاسی یێن کوردان بەری نها شاندەک ژ بۆ دانوستاندنان ل گەل شامێ دەستنیشان کرینە و گرنگە شام د زووترین دەم دا ل گەل شاندێ کوردی دەست ب دانوستاندنان بکەت، لێ مخابن نها خەمساریەکا مەزن ل هەمبەر دەستپێکرنا دانوستاندنان هەیە و ئەو یەک ژی دێ ئەنجامێن خوە یێن گەلەک خراب بۆ هەموو سووریێ هەبیت.
سەبارەت ب پاشەرۆژا سووریێ ژی ئەنجوومەنێ نشتیمانی یێ کوردی دیار کریە دڤێت سووریایەک نوو و نە ناڤەندی بهێتە ئاڤاکرن دا بشێت هەموو پرسێن هەی ل سووریێ چارەسەر بکەت، هەموو پێکهاتەیێن ل سووریێ ژی داخوازا سیستەمەکێ دیموکرات و نە ناڤەندی دکەن و گرنگە شام ژی گوهداریا داخوازیێن هەموو پێکهاتەیێن ل سووریێ بکەت.
