بێ پلانی پیلانان د دووڤ خوه‌ دا دئینیت!

ئه‌ز ل ڤێرێ ل دیرۆكا گه‌لێ كورد نازڤرم كا چاوا و ب چ ره‌نگ سه‌ره‌ده‌ری ل گه‌ل كاودانێن سیاسی و ئابووری و ناوچه‌گه‌ریی و دۆزا خوه‌ كریه‌! به‌لكو ل سالا 1992 ده‌ست پێكه‌ین كو بۆ جارا ئێكێ هه‌لبژارتن ل هه‌رێما كوردستانێ هاتنه‌ كرن، به‌لێ چونكی ل وی ده‌می چ پلان و به‌رنامێن نه‌ته‌وه‌یی نه‌بوون و ململانێیا حزبی یا زالبوو ل سه‌ر جڤاكێ كوردی و ئێكدو نه‌ قه‌بوولكرنێ ده‌رئه‌نجامێ وێ بۆ دروستبوونا شه‌ڕێ براكوژیێ د ناڤبه‌را پرانیا لایه‌نێن سیاسی یێن كوردی كو هه‌تا ئه‌ڤرۆ خه‌لكێ كوردستانێ یێ باجا ڤی شه‌ڕی دده‌ت و هه‌رده‌ما لایه‌نێن كوردی نیازه‌ك ژی هه‌بوویه‌ كو كێشه‌یێن ناڤخوه‌ چاره‌بكه‌ن، دوژمنێن گه‌لێ كورد رێ نه‌دایه‌ و راست و راست مایتكرن كریه‌ و دژاتی د ناڤبه‌را لایه‌نێن كوردی ئالۆزتر لێكریه‌! و ناهیَِلێن كورد ب چ ره‌نگان مفایی ژ كاودانێن نوكه‌ د رۆژهه‌لاتا ناڤین دا دروست بووین ببینن و رۆژ بۆ رۆژێ یێ پیلان ل دووڤ پیلانێ ل دژی كوردان دگێرێن و مخابن ئه‌ڤرۆ هێشتا هنده‌ك لایه‌نێن كوردی هه‌نه‌ رێكه‌فتنان ل گه‌ل دوژمنێن دۆزا كوردی باشتر دبینن ژ چاره‌كرنا كێشه‌یان د گه‌ل لایه‌نێن كوردی كو پتریا وان كێشه‌یان یێن به‌رژه‌وه‌ندی و پلا و پۆستانه‌! و چونكی ئه‌م د بێ پلانین له‌ورا پیلان و قه‌یران وه‌كی بارانێ نه‌ ل سه‌ر جڤاكێ كوردی !! كێشا نوكه‌ هاتیه‌ ئازراندن ژ لایێ چه‌ند پارته‌كێن كوردیڤه‌ ل سه‌ر پۆستێ سه‌رۆكاتیا هه‌رێمێ به‌رنامێ وێ كێشێ و پیلانێ ئیرانێ یێ دارێتی و بابه‌ت نه‌ پۆسته‌!! به‌لكو كێشا ئیرانێ د گه‌ل سه‌رۆك بارزانیه‌ و پارتی! كو رێگرێن ل به‌رامبه‌ر حه‌ز و به‌رژه‌وه‌ندیێن ئیرانێ د ده‌ڤه‌رێدا، له‌ورا دبینی ژ لایه‌كی په‌كه‌كه‌ و په‌یه‌ده‌ و ژ لایه‌كی ئێكه‌تی و گۆران و ژ لایه‌كی ڤه‌ به‌غدا ئانكو ژ هه‌می لایانڤه‌ گڤاشتنان دكه‌ن و پیلانان دگێرن داكو پارتی لاواز بكه‌ن و ده‌ست ژ پرۆژێ نه‌ته‌وه‌یی به‌رده‌ت و جاره‌كادی هه‌رێما كوردستانی بكه‌ڤیته‌ بن ره‌حما به‌غدا بۆ هه‌ر تشته‌كی! به‌لێ دبێژین مخابن پارتی چ پلان نه‌بوون كو دژی ڤان پیلانان راوستیت و حوكمه‌ت و حزب هه‌تا راده‌كێ مه‌زن تێكه‌ل بووینه‌ و نوكه‌ كێشه‌یێن مه‌زن ژی په‌یدا بووینه‌ ئه‌ڤه‌ هه‌كه‌ ئه‌م بزانین كه‌سێن به‌رژه‌وه‌ندپه‌رێس هه‌ر دو لا حوكمه‌ت و حزب بۆ دابینكرنا به‌رژه‌وه‌ندیێن خوه‌ بكاردئینن و ل سه‌ر كیستێ دیرۆك و خه‌بات و قوربانیدانا پارتی و ئه‌ڤ چه‌نده‌ بوو ئه‌گه‌ر پارتی تووشی كێشان ببیت د گه‌ل جه‌ماوه‌رێ خوه‌ كو باوه‌ریا وان لاواز بوویه‌! له‌ورا دبێژین هه‌ر چ زوویه‌ دڤێت پارتی لێنێرینه‌كێ ل خوه‌ بكه‌ت به‌ری به‌رامبه‌ر پیلانان راوستیت و سیسته‌مێ خه‌لات و سزا په‌یره‌و كه‌ت و دوور ژ هه‌ر تشته‌كی كه‌سێن خه‌مسار و لاواز و كو بووینه‌ سه‌ده‌مێ دروستكرنا كێشان سزا بده‌ت و لابده‌ت و سه‌رژنوو كارێ رێكخستنێ رێكبێخیت و ل دووڤ دا بچیته‌ به‌رهنگاریا پیلانان!! هه‌كه‌ نه‌ پیلان زۆر دمه‌زنن و بارودۆخ زۆرێ مه‌ترسیداره‌ و ئهه‌كه‌ لایه‌نێن دی یێن كوردی ل خوه‌ نه‌زڤرن و بیر ل ده‌رده‌سه‌ری و قۆربانیدانا ڤی ملله‌تی نه‌كه‌ن و ڤان كێشان ب به‌رنامه‌ و هزر و ڤیانا نه‌ته‌وه‌یی چاره‌نه‌كه‌ن و پلانه‌كا نه‌ته‌وه‌یی بۆ كێشێن دۆزا كوردی نه‌ دانن! زێده‌تر خه‌لك خوه‌ ل به‌ر ڤان قه‌یرانان ناگریت و ژ هه‌می لایه‌نان ڤه‌ كورد لاواز بن و دكه‌ڤنه‌ بن فشارا به‌غدا و ئیرانێ و كورد ژ هه‌می حه‌ز و هیڤیا ئێنه‌ بێ باركرن، له‌ورا هێڤیدكه‌ین ئه‌ڤ بارودۆخه‌ یێ هه‌ستیار و نازك ب كێمترێن زیان و كێشه‌ ل سه‌ر ڤی ملله‌تی ده‌رباز بیت و پارتێن كوردی بیر ل به‌رژه‌وه‌ندیا ڤی خه‌لكی بكه‌ن نه‌ك ب تنێ به‌رژه‌وه‌ندیێن خوه‌ یێن حزبی یێن ته‌سك!

کۆمێنتا تە