بێ گازند ئۆبال هلگرم
هزرڤان
ته‌ناهیا د جانێ من دا
پڕ ژ مێژه هاتی تێكدان
ژ ده‌نگێ ده‌ری نه ترسه!
وه‌ك ته دڤێت
ب كه‌ڤرێن ئارامێ لێ بده
ژ خوه پێڤه ل هه‌بوونێ
چو كه‌سان گونه‌هبار ناكم.
هانێ بۆ نه‌فرینان نابم
دارمازیا ل باخێ من یێ چیایی
چار جۆرێن به‌ری پێڤه دهێن
وه‌ك نه‌فرینێن پیره‌ژنان
ته‌ڤا به‌ران..
ژ بۆ خوارنێ و چه‌ق و تایان لێ خوار ناكم.
دارهنارێن باخچه‌یێ من پڕ تێهنینه
بێده‌نگ، هه‌ستێن من بۆ دگرین
ما تو بێژی، ژ دووربوون و نه ئاڤدانێ
هه‌ردو هنارێن سینگێ ته و..
ته‌ڤدا دارێن ل باخێ من بچرمسن؟!
ڤێ ئۆبالێ ل ته بار ناكم.
هه‌ر جاره‌كا بیریا ته دكم
هه‌ست پێ دكم، ل ڤێ هه‌بوونێ قوربانیمه
ب سۆچه‌كی من نه‌كری گونه‌هبارم
مرن د همبێزا ته دا
ژ ڤێ دووریێ هێسانتره
دكم.. ناكم
ب ڤان خه‌ونێن نه پێباوه‌ر ده‌بار ناكم.
وه‌كی فڕنده‌كی كووڤی د ره‌كێ دا
ژ بێزاریا ل ناڤ په‌نجێن ته‌نێبوونێ
خوه ل دار و دیواران ددم
دكم قیژی
ب هان و هاوار بانگ ته دكم
وه‌ره، ته‌نێبوونێ بكوژه!
پاشی چو جار، ئه‌ز همبێزا ته سار ناكم.
ئه‌ز یێ بوویمه دێوانه‌یێ چل و چیا
زمانێ داران دزانم
ب ئێشا ماران دزانم
لێ قه‌ت داره‌ك.. نه ژی ماره‌ك
ب ده‌ردێ من خه‌مبار نینه
نه تو داری و نه ژی ماری
تو دلبه‌رێ و
ته دلبه‌رێ خه‌مبار ناكم.
بوارا من وه‌ك تیرمه‌هێ
ژ ره‌نگێ ره‌ش مخازر بوو
په‌لاتینكێن ئومێدا من..
بوونه گه‌را ل به‌ر باگه‌رێ
پێل- پێل، به‌ر ب دوور كۆچ دكن
ژ وه‌ریانا به‌لگێن خوه یێن كه‌سك دترسم
هه‌ر چه‌نده ئه‌ز بۆ مرنا خوه پرسیار ناكم.
بێ ته هه‌ر تشت
ل ناڤ ئه‌ڤێ ژیانا ڕژ
ژ هه‌پاره‌یێن خه‌ونرۆژكان پێڤه‌ترێ تشته‌ك نینه
ل ناڤبه‌را من و دینبوونێ گاڤه‌كه
وه‌ره هێڤكه ئه‌ڤێ ره‌وشا كه‌تی و كه‌مباخ
باس ژ برینێن خوه یێن به‌رێ و كه‌ڤنار ناكم.
ل ناڤ ئه‌فسانه‌یێن كه‌ڤنار ل خوه گه‌ڕیام
ل په‌رستگه و بڕێن دیندار ل خوه گه‌ڕیام
ل ناڤ پرتووكێن زانستی و..
یێن به‌ركنار ل خوه گه‌ڕیام
د ناڤ ئه‌ڤینا مه‌لێ دا ببوومه به‌لگ
ژ بۆ هاتنا ته دوه‌ریام..
هندی هند فێری ئێشێ بووم
ئێدی ژ ژانان هه‌وار ناكم.
