بەختێ من و بەختێ تە
ئەلند مزووری
ئەو هیڤیێن
ژ كاروانێ عەشقا
هەبوونێ
ڤەقەتیاین
یێن دناڤ پەراسیێن
دەمیدا
خەونێن خۆ ڤدگێرن
یێن تەحلە فنجانا
قەهوا بێ ئۆمێدیا
سەرنشیڤ دكەن
دا فالەكێ بۆ بەخت ڕەشیا
خەونێن خۆ
دناڤ دا ڤەگەن،
ئەرێ..
هوین دبێژن
دێ ڤێ جارێ ژی
بەختێ خەونێن مە
وەكی هەر جار بیتن..
هەوە چ گۆت؟
ئەز بخۆ دبێژم
فاڵكا ڤێجارێ ژی
چ تشتەكی ژ فالكێن جارێن دی
جودا ناكەت..!
ئان نە؟
هەما بهێلن..
ئەڤە ئەز هەیم
من حەز
ژقەهوا تەحل نەكریە
هەر جارا من
بێ دلی خۆ ژی فرەك لێدای و..
ژی ڤەخواری
فرا دوێ
من بەختێ خۆ یێ ڕەش
دناڤ ڕەشاتیا وێ دا
تێكەل كریە و..
من فالك پێ ڤەكریە.
بەلكی جارەكێ سپیاتی
وەك بەفرا ل پۆرا من دا باری
ئاقارێن بەختێ مە ژی
ب داپۆشیت.
بەلێ هێشتا
جارەكێ ژی
بەختێ من تێدا
سپی نەكریە
وەلاتێ من..
ئەز دزانم ئەز یێ بۆ تە دژیم
دلێ من بۆ عەشقا تە
یێ خۆ دكەتە وار و هێلین
چاڤێن من
یێن بۆ بەختێ تە
رۆندكان دبارینن و
دگرین،
ئەڤە من لبیرە
بەختێ من و بەختێ تە
وەكی ئێكە!
نە لتە سارێژدبن برین،
نە لسەر لێڤێن من
جارەكێ كەهی دبن
كەنی و گرنژین.
