بەخشندەبە.. نە تیرهاڤێژ
ئارین عیسا عەبدولرەحمان
بەخشین ئێك ژ تشتێن گرنگە د ژیانێ دا، ب تایبەت ئەگەر بێی مەرەم ژ دلێ مرۆڤی بۆ دەستێ كەسەكی بچیت، دایكا من بەردەوام دبێژیت ڤیانا دلی ژ دانا دەستان دیاردبیت. بەخشین ب تنێ ب پارەیڤە یا گرێدای نینە، چونكی هندەك تشت یێن هەین ب سەروەت و سامانێ دونیایێ هەمییێ نادەین، لەوڕا ئەو كەسێن پارە بتنێ هەین گەلەك د هەژارن، كەسێن كو ژ ڕۆح، دل و گیانێ خوە د بەخشن دەولەمەندترین كەسن، هەر وەكی مەولانا ڕۆمی دبێژیت:(ئەگەر زۆرت سامان هەیە، لێی ببەخشە، كەمت هەیە؟ لەدلەوە بەخشندەبە!). هندەك كەس هەنە ژەهراوینە و تیرهاڤێژن ژ ئەگەرێ ئەوێ كەربوكینا د دلێ ئەواندا ژەهرێ چێدكن و ب ڕێكا ئەوێ ژەهرێ جڤاك و كەسان ژەهراوی دكن. چەندین جۆرێن كەسێن ژەهراوی هەنە كو ب كێمی د ژیانا هەر ئێك ژ مەدا هەنە و كارتێكرنەكا نەرێنی دكنە ل سەر ڕۆژانێن مە، ژ ئەوانژی (دووروی، ڕەخنەگرێ ژناڤبر، كەسێ نەرێنی و درەوكەر، بێ باوەر، حەسوید (چاڤپێنەڕابووی) و …).
ئەم د سەردەمەكی دا دژین مرۆڤ گەلەك كێمن، پترییا كەسێن ل دەوروبەرێن مە ئەستەمە ب مرۆڤ بهێنە ناڤكرن، چونكی بەردەوام ئەو هەڤڕكییێ ل گەل هەر تشتەكێ ل دەردۆرا خوە دكن، هەر تشتەكێ د شیانێن ئەوان دا هەی دكن، هەر چ نەبیت ب گۆتنەكێ دێ دلێن ئێك هەڕفینن، دێ ڕۆژا ئێك و دوو وێران كن، سەیرە چونكی ب هزرا ئەوان ئەڤە دەستكەڤتەكە و ئەوان تشتەك گەلەك مەزن بدەستخوەڤە ئینات، لێ ئەز، تو و ئەم هەمی پێكڤەژی باش دزانین وەنینە، ئەم مرۆڤ پێدڤی ب نەرم و نیانێی نە، پێدڤی ب هندێ نە ئێكودو بلندبكین ل شوینا ل ئاخێ بدین. هندەك كەس گەلەك یێن فێربووینە هندێ ژەهرێ دەردن ب تایبەت ب ڕێكا ئەزمانێ خوە، وەكی مارەكێ دوو سەر ب سڤۆرەیەكێ بێ گونەهـ ڤەددت، ئاخر گیانەوەر بێ مێشكن و ئەو ل گۆڕەی پێدڤیاتییا ژیانێ ئەڤێ چەندێ ئەنجام ددن. چەند كەس هەنە ژ ئەگەرێ پەیڤەكێ ژ لایێ مامۆستایێن ئەوان یان نێزیكێن ئەوانڤە هاتینە گۆتن پاشڤەچووینە و ئەو ڕووناهییا ڕێكا خوە پێ ددیتین ڤەمراندییە و باوەرییا ئەوان ب كەسایەتییا ئەوان كێمبوویە و بەرزەبووینە! چەندین كەس هەنە ژ ئەگەرێ ڕەشبینییا كەسێن دیتر پارچەیەك ژ ڕۆحا ئەوان بۆ هەتا هەتایێ ڕەش و تاڕی مایە و كەرب ژێ ڤەبووینە و بوویە ئەگەرێ برینداربوونەكا ئەبەدی یا بێی چارەسەری. ئەڤە هەمیژی ژبەر پەیڤەكا بۆ ئێك خۆلەكەكا بێی هزركرن هاتییە گۆتن و تێرا تەمەنەكی خەم و ئازار ل پشت خوە هێلاینە. ئەم مرۆڤ گەلەك ژ هندێ مەزنترین، پیرۆزترین و وێرەكترین، بلا گۆتنا پەیڤێن نەخوەش تە ژ مرۆڤبوونا تە دویر نەئێخیت. مە مرۆڤان شیانێن مەزن هەنە و دشێین گەلەك تشتێن باش ئەنجامبدین، هێزا پەیڤێ گەلەكە نابیت ئەم ب كێمی ببینن، ئەم دشێن ب ڕێكا پەیڤەكا خودان سێ یان چار پیت درێژاهییا ڕۆژا كەسەكێ خوەش بكین، بۆچی نە! ئەگەر نەبمە گۆل بۆچی دێ بمە ستری! ئەم بەردەوام پێدڤی ب پالپشتییا ئێكودووینە. ئەم دزانین ئەو چاكییا مرۆڤ دكت ئەگەر پەیڤەك بتنێ ژی بیت دێ ڕۆژەكێ بۆ مە هێتە زڤڕاندن و ب شێوەیەكێ گەلەك تایبەت و د دەمەكێ گەلەك پێدڤی دا. ئەڤجا بلا ئەم بەخشندەبین و بەخیلییێ د ئەڤێ چەندێ دا نەكین، ئەم دشێن جاران ب ڕێكا پەیڤان ئێكودو هەمبێزبكین و زەحمەتییا ژیانێ ل بەر ئێكودوو سڤك بكین چونكی ئەم نزانین كیژ پەیڤ و گۆتنا مە دێ بیتە ئەگەرێ سەركەڤتن و بهێزبوونا كەسەكی. پەیڤێن دلوڤان نە بەس هێزێ ب مرۆڤی دبەخشن، بەلكی دەست دكنە دلێ مە و ب بوورینا سالان دمینن ل گەل مرۆڤی، ژبەر هندێ ببە ئەگەرەك كو كەسەك باوەریێ بینیت هێشتا باشی یا د ناڤ مرۆڤان دا هەی، هندی ژ تە بهێت دلێ كەسێ نەشكێنە چونكی هەر ئێكی تێرا خوە ئێش و ئازار هەنە و ژیانێ تێرا خوە یێن بێزاركرین و تو. بارێ ل سەر ملێن ئەوان گرانترنەكە، هەروەسا یا باشتر وەسا سەرەدەرییێ ل گەل مرۆڤان بكە كا چاوا تە دڤێت سەرەدەریێ ل گەل تە بهێتەكرن ئانكو ببە هێزەكا نەژبیركری نەبە تیرەكا ژەهراوی.
