بەربژارەكێ پارتی دێ قوتابخانەیەكێ ل شێلادزێ ئاڤاكەت
ئامێدیێ، مەحمود نهێلی:
پشتی گەهشتنا گازەندیا وەلاتیێن كۆمەلگەها دو برا ستی ل سەر نەبوونا قوتابخانەیەكێ ل كۆمەلگەها وان، ئێك ژ بەربژارێن پارتی ل سنۆرێ دەڤەردارییا ئامێدیێ دەست ب دانانا كابینەیان كر، وەكو قووناغا ئێكێ ژ بۆ دروستكرنا قۆتابخانەیەكێ.
ماموستا عامی چیچۆ، سەرپەرشتیارێ پەروەدەیی ل پەروەردەیا ئامێدیێ و ئێك ژ سەرپەشتێن چێكرنا ڤێ قۆتابخانەیێ بۆ رۆژناما ئەڤرۆ دیار كر، ژ بەر نەبوونا چو قوتابخانەیان ل ڤێ كۆمەلگەهێ، خەلكێ ڤێ كۆمەلگەهێ خرڤەبوونەك ئەنجام دا بوو و گۆت: «ژ بەر كو دانانا قۆتابخانەیێ ژی دەمەكێ زۆر دڤێت، هەتا بهێتە چێكرن، دكتۆر بەیار سەفەر رێكانی، كو ئێكە ژ بەربژارێن سنۆرێ دەڤەردارییا ئامێدیێ و بازنەیێ دهۆكێ بڕیار دا ل سەر ئەركێ خوە قۆتابخانەیەكێ ب كابینەیان ل ڤێ كۆمەلگەهێ دروست بكەت».
ناڤهاتی دیار ژی كر، قوتابخانە ژ دانانا 13 كابینەیان دێ پێك هێت، نەهـ ژ وان بۆ قوتابیانە و یێن دی ژی بۆ رێڤەبەریێ و كارگێرییا قۆتابخانەیێ نە و گۆت: «هەتا دەستپێكا مەها بهێت ئەڤ قۆتابخانەیە دێ هێتە دانان و قوتابی دێ دەوامێ تێدا كەن».
گۆتژی: «بۆ وەرزێ بهێت دەزگەهێ خێرخوازیێ بارزانی رازیبوونا خوە دیار كریە ل سەر چێكرنا قۆتابخانەیەكا 12 رێزی ژ بۆ چارەسەركرنا ئاریشەیا قوتابییان ل كۆمەلگەها دو برا ستی ل ناوچەدارییا شێلادزێ».
