بەرخ و بەران
ئەڤراز حامد نسری
ل وی دەمێ دەنگوباس هاتین کو دوژمن یێ ب هێزەکا گران بەرەڤ باژێرێ مە دهێت، من دەست دا چەکێ خۆ، دەیکا من هاتە بەرامبەر من، ب وێ کەیفا ل سەر ڕوویێ وێ، دەستەک دانا سەر ملێ من و گۆت: کوڕێ من، نەترسە، هێزا تە د وێ باوەرییێ دایە یاکو د دلێ تەدا دژیت.
ئەز بەرەڤ چیای چووم، شەڕ دەستپێکر و دەنگێ گولەیان چیا هەژاند، من دیت لپشت مە دەیک و خویشک و کچێن باژێرێ مە، بێ ترس د بن گولەیان دا ئاڤ و تەقەمەنی بۆ مە دئینان، من ب چاڤێن خۆ ددیت کو وان چ جاران پشت نەددا دوژمنی.
دەمێ شەڕ گەرم بووی، فەرماندەکێ دوژمنی ب دەنگەکێ بلند هەوار کر: خۆ ڕادەست کەن، هین چەند کەسەکن و ئەم سوپایەکین!!
ل وێ گاڤێ، دەیکا من ب هەوارییەکا بلند گۆتێ: ئەی یێ کو تو مە نەنیاسی، وەرە مەیدانێ دا بزانی کی بەرخە و کی بەرانە، دا بزانی کا چەوا ملەتەك تەمام د قالبێ زەلامەکێ مەدا هەیە و بزانی کا چەوا کچێن مە ب دەهـ زەلامانە.
من هەست ب هێزەکا سەیر د ناڤ خوینا خۆ دا کر، مە هێرشەکا بێ وێنە بر و دربێن مەزن ل دوژمنی دان، مە نیشا وان دا کو مێرانی نە ب کێم و زۆرییێ یە، بەلکو ب باوەری و خۆڕاگرییێ یە.
