بەردانا ژنـێ یا درسـت ب گـۆتنێ یە
بێوار حەمدی:
د یاسایا بارێ کەسایەتی دا، د ماددێ 34 دا هاتیە کو بەردانا درست ئەوە ژن ب ڕێیا ئاخفتنێ بهێتە بەردان، زانایەکێ ئایینێ ئیسلامێ ژی گۆت: هەکە بەردان ب دوو جارێن ئاخفتنێ ژی بیت ژن ناهێتە بەردان.
ژلایێ قانوونیڤە پ.د. ئیسماعیل بامەرنی ماموستایێ زانکۆیێ و شارەزا د بوارێ کەسایەتی دا د دیدارەکێ دا بۆ ڕۆژنامەیا ئەڤرۆ دیار کر کو بەردانا ژنێ یا درست ب ئاخفتنێ یە و پێدڤیە زەلام ب ئاشکرایی بێژیت و گۆت:(د یاسایا بارێ کەسایەتی دا د ماددێ 34 دا هاتیە کو بەردانا درست ئەوە زەلام ژنێ ب ئاخفتنێ بەردەت و ژنێ ژی ماف هەیە خۆ بدەتە بەردان، لێ دڤێت وەکالەت هەبیت، دیسان دادوەر ژی دشێت ژنێ بدەتە بەردان، لدووڤ هندەک مەرجێن یاسایی هەکە خۆ زەلامی نەڤیا بەردەت ژی).
پ.د. ئیسماعیل بامەرنی د بەردەوامیا ئاخفتنێن خۆدا دیار کر کو ب ڕێیا یاسایی درستە زەلام بتنێ ب ئێک جار ژنێ بەردەت، چونکو یاسا لسەر هندێ ئێکلا بویە هەکە زەلام سێ جاران ژی بێژیت د ئێک ڕوینشتن دا هەر ب ئێک بەردان حسابە و گۆت: (بەلێ هەکە د سێ جارێن جیاوازدا زەلامی گۆتە ژنێ من تو بەردای ل وی دەمی ژن ب ئێکجاری دهێتە بەردان و نەشێت جارەکا دی ل هەڤژینێ خۆ بزڤریت).
ژلایێ ئایینیڤە زانایێ ئایینێ ئیسلامێ مەلا چەلەنگ مشیر، سەبارەت هەمان بابەت گۆت: (بەردانا ب ڕێیا ئاخفتنێ ژی ئێک ژ جورێن بەردانێ یە و هەتا هەکە زەلام ب یاریڤە ژی بێژیتە هەڤژینا خۆ من تو بەردای دێ هێتە بەردان لێ بەردانا ب ئاخفتنێ یا جارەکێ و سێ جاران جیاوازیا خۆ هەیە).
مەلا چەلەنگ ئەوچەندە ژی دا زانین کو ئیسلامێ گەلەک ب هشیاری بەحس ل بابەتێ بەردانێ کریە، ڕاستە هاتیە حەلالکرن لێ لدووڤ چەند مەرجەکان و گۆت: (ژن ب بەردانا ب ئاخفتنێ بتنێ جارەکێ ناهێتە بەردان کو پەیوەندیا وان نەزڤریتەڤە، ژبەرکو ئیسلامێ گۆتیە هەکە هاتو ژن دوو جاران ژی ب ئاخفتنێ بهێتە بەردان ئەو دشێت جارەکا دی ل هەڤژینێ خۆ بزڤریت، بەلێ ب مەرجەکی کو عوددێن وێ خلاس نەبن، ئەگەر هات و عوددێن وێ خلاس ببن دڤێت جارەکا دی زەلام هەڤژینا خۆ مەهر بکەتە ڤە).
