بەردان سـێ به‌رانـبه‌ر زێده بوویـه
قائید میرۆ:
سه‌رۆكێ ئێكه‌تیا زه‌لامـێن كوردستانێ د دیدارەکێ دا بۆ ڕۆژنامەیا ئەڤرۆ دیار کر کو رێژه‌یا بەردانێ زۆر زێده‌بوویه و ژ هه‌ر چار گرێبه‌ستێن هه‌ڤژینیێ ئێك ژوان دهێته هه‌لوه‌شاندن.
بورهان عه‌لی، سه‌رۆكێ ئێكه‌تیا زه‌لامێن كوردستانێ دیار كر، قه‌یرانا دارایی كاریگه‌ریێن راسته‌وخۆ لسه‌ر زێده‌بوونا ئاریشه‌یێن خێزانی هه‌یه و گۆت:( بتایبه‌ت لسەر زەلامی، ژبەرکو شتی گیرۆبوونا مووچه‌ی زەلام تووشی ئاریشه‌یان بووینه، چونكو زەلام به‌رپرسیاره ژ دابینکرنا پێدڤیێن ماددی یێن خێزانێ).
بورهان دا زانین کو ژبلی گیرۆبوونا مووچه‌ی و كاریگه‌ریا لسه‌ر فه‌رمانبه‌ران كار ژی لاوازبوویه و كاریگه‌ری لسه‌ر هه‌موو جڤاكی كریه و گۆت: (ل گوره‌ی زانیاریێن به‌رده‌ستێ مه هه‌ر ژ سالا 2014 قه‌یرانا دارایی په‌یدابوویە و یا به‌رده‌وامه و دوباره دبیت، هەکە ره‌وشا دارایی یا كه‌سه‌كی یا باش ژی بیت هند قه‌ر لێهاتینه كرن و بۆ نه‌هاتینه ڤه‌گه‌ڕاندن، لەوما باوەری ب کەسێ نەمایە کو قەران ژی بدەتێ).
سەرۆکێ ئێکەتیا زەلامێن کوردستانێ گۆتژی: (مخابن جه‌ژنا بۆری هژماره‌كا زۆر یا وه‌لاتیان شیانێن كڕینا پێدڤیێن جه‌ژنێ نه‌بوون و جه‌ژن وه‌ك پێدڤی نه‌هاته‌كرن، هەکە قه‌یرانا دارایی یا به‌رده‌وام بیت و مووچه هه‌ر گیرۆ ببن دێ كاره‌سات په‌یدابن و ئاریشه‌یێن زۆرتر بۆ خێزانێن هه‌رێما كوردستانێ په‌یدابن).
بورهان عەلی زێدەتر گۆت: (پێدڤیێن ژیانێ زێده‌بووینه و زارۆک نزانیت پێدڤیێن رۆژانه چاوا دهێنه په‌یداكرن بتنێ دخوازیت بۆ بهێنه دابینکرن، زارۆك نزانیت هه‌بوون و نه‌بوون چیه بتنێ وی دڤێت داخوازیێن وی بو بجهبینن).
سه‌رۆكێ ئێكه‌تیا زه‌لامان ئاماژه بڤێ چەندێ ژی کر کو ژ هه‌ر چار خێزانێن دهێنه پێكئینان ئێك ژ وان دهێته هه‌لوه‌شاندن و هه‌ڤژین جودا دبن و گۆت: (ئه‌ز پێشبینی دكه‌م ل داهاتی رێژه‌یا بەردانێ هند زێده ببیت ببیته 50%ێ، سالا 2010ێ ل هه‌رێما كوردستانێ 48 هزار حاله‌تێن هه‌ڤژینیێ هاتبوونه تۆماركرن و د هه‌مبه‌ردا تنێ چار هزار حاله‌تێن بەردانێ هاتبوونه تۆماركرن، ل سالا بۆری 2024ێ پێنجی هزار گریبه‌ستێن هه‌ڤژینیێ هاتینه تۆماركرن، به‌لێ مخابن نێزیكی 14 هزار حاله‌تێن بەردانێ ل سالا بۆری هاتینه تۆماركرن، ئه‌ڤه‌ژی بۆ مه دیار دكه‌ت کو رێژه‌یا بەردانێ چه‌ند به‌رامبه‌ر زێده‌كریه).
بورهان، دیار کر ژی، ئاریشه‌یێن خێزانی و قه‌یرانا دارایی ئه‌گه‌رن بۆ زێده‌بوونا رێژه‌یا بەردانێ، مخابن زۆربه‌یا ئاریشه‌یان ژی پشتی بەردانێ ده‌ستپێدكه‌ن، بتایبه‌تی بۆ ژنان بەردان زۆر یا دژواره، چونكه ژێده‌رێن په‌یداكرنا ماددی نینن و نه‌شێن پشتی بەردانێ خۆ ب رێڤه‌ببه‌ن و هەکە زارۆك ژی هه‌بن هه‌ر ئێكجار یا ب زه‌حمه‌ته.
بورهان عه‌لی، د بەردەوامیا ئاخفتنێن خۆدا دیار کر کو سۆشیال میدیا بۆ خزمه‌تا مرۆڤایه‌تیێ هاتیه چێكرن، به‌لێ بۆ جڤاکی بوویه ژێده‌رێ ئاریشه‌یان، ژبەرکو زور جاران هەڤژین ژی خەلەت بکاردئینن، بتایبەت زەلام کو په‌یوه‌ندیێن نهێنی هه‌بووینه و كۆد داناینه سه‌ر مۆبایلێن خۆ، به‌لێ ژبیركریه و بۆ زارۆكێت خۆ ڤه‌كریه و هه‌ڤژینێن وان پشكنین بۆ مۆبایلا زەلامێ خۆ كریه و ئاشكرا بوویه په‌یوه‌ندی دگه‌ل ژنێن دی هه‌بوویه و گۆت: (نابیت ژنێ و زەلامی په‌یوه‌ندیێن نهێنی و خیانه‌ت هه‌بیت، چونكه ته‌كنه‌لۆژیا و مۆبایل تشته‌كێ ئه‌مین نینه و دێ هه‌ر ئاشكرا بیت، ئێك ژوان ئاریشه‌یێن نوكه هه‌ی ئه‌و په‌یوه‌ندیه یا كو ب ڕێیا مۆبایلێ دهێته چێكرن دناڤبه‌را دو كه‌سان).
