بەرزەخ
فەهیما ئیبراهیم
ل وی دەمێ هزار پرس د ئێک چرکەدا مێژکێ تە ڤەدکۆلن و تو بێدەنگ دمینی، ل وی دەمی بزانە ناخێ تە یێ تژی بوویی. هەر تشت بێ ئیرادا تە دێ ژ ناخێ تە دەرکەفت دبت ئەگەر یێ ڕۆهن و ئاشکرا بت، چ بەرسڤ بۆ پرسێن تە نەبن، لەو دێ خوە د ڤێ رەوشێ دا دبینی.
پێیێن خوە هلدانە د ئاڤێ دا و وێنەیێ خوە یێ شکەستی دناڤ زڤرۆکێن ئاڤێ دا دیت و هێدی هێدی ئەو وێنە بژالە بوو.
ئەڤە دانەکی رۆژێ یە ژینێ ل ڤێ ڤەدەریێ ل سەر لێڤا دەریایی یا روونشتی. تژی دەستێن وێ ڕەملا تەڕە، یا دڕێژت و دوبارە تژی دکەتە ڤە. هزرێن وێ ب ئێکجاری نە ل وی جهی نە، ئەو هەموو ژ دەستدان و ئازارێن دیتین، ناهێنە شرۆڤەکرن. حەسرەت د دلی دا ئاکنجیبووینە. بووینە دەرد، بووینە کۆڤان و کەسەر.
– تە ئەڤ هەموو ئازارە د چاڤێن من دا ددیتن و تو مینا بیانیەکی دوورکەتی!
بێی ل پشت خوە بزڤڕت، بەرێ خوە دا کنارێن دوور یێن دەریایێ. ئاگەهی ژ دلێ خوە نەبوو ژبەر بیرهاتن و هورهورکێن وان دئێشا، ئاخینکەکا کوور ڕاهێلا و گۆت:
-دا چ روودەت ل وی دەمێ من دگۆتە تە دا پێکڤە ب ڕەڤین؟ ژیان بتنێ دەرفەتەکێ ددەتە مرۆڤان، یا دناڤبەرا مە دا ژ سینۆرێن هەر پەیوەندیەکێ مەزنترە.
تو ڕازی نەبووی، تە باش دزانی هەموو دژی پەیوەندیا هەوەنە، تە هەلبژارت تو بهێی دەرگەهی بقوتی. تە باش دزانی ئەو دەرگەهە چ جاران ل پەیوەندیا مە ڤەنابت. تو یێ رژد بووی دەستان ژ من بەردەی. دا کو ناڤێ من پیس نەبت. تو ڕازی نەبووی ل سەر خاترا هەر تشتەکی بەرامبەر ڕاوەستی. من ژی ب ساناهی دەستداهێلان.
تە باش دزانی دوورکەتنا مە دێ گرێکەکا دەروونی ل نک من پەیداکەت، بەلێ تە خوە بێدەنگ کر، تە پشتا خوە دا هەر تشتەکی و تو ب رێیا خوە چۆیی، ئەڤە ژی جۆرەکێ دی یێ ئێشانێ یە ل وی دەمێ دل دکەتە گری، هەر کێلیک ل بەندا تە هەروەکو ژیەک و هێشتا دەربازنەبوویی.
دلێ وێ هند یێ ئارامە هەروەکو نە ئەو دلە بوو یێ بەرێ چەند دەمژمێرەکان د وێ ئاژاوێ دا!
وێ پەنا برە بێدەنگیێ دا کەربا خوە ل پشت ڤەشێرت، پێلێن دەریای ل ئێڤاریان. بەری رۆژئاڤابوونێ پتر هاردبن، ئەو فێربوو دەمێ کەربا وێ ژسینۆران دەرباز دبوو، قەستا سەر کنارێن دەریایێ دکر. ل هەمبەر ئاڤابوونا رۆژێ رۆندکێن پەشێمانیا خوە بەرددانە ناڤ پێلێن سوور یێن دەریایێ.
ئەڤە ئەو رۆژا ئەو گەهشتیە ڤی وەلاتی و تا نهۆ ژ پەشێمانیێ پێڤەتر وێ چ تشتێن دی نەدیتیە. هزر ژ هێزا ل بەرخوەگرتنا وێ زێدەترن. هزرێن چ بکەت یێن چ نەکەت. ژیان ل بەر وێ مینا زیندانەکا حەتاحەتایێ لێهاتیە.
ژینێ، ل دۆر خوە زڤڕی. وێ باش دزانی ئەو دێ ل پشت هێت، وێ باش دزانی چ جاران ئەو ناهێلت ئەو ئارام بمینت، چاڤێن وێ ژ دوور ب هەڤژینێ وێ کەتن. هەولدا پشتا خوە ب دەتێ دا وەسا هزربکەت کو وێ ئاگەهـ ژ وی نینە، دەستێ خوە مینا هەر جار ب سەرێ وێ دا ئینا خوار. وێرەکی نینە بەرێ خوە ب دەتە ناڤ چاڤێن وێ. ژ بەرکو هێمایێن حەزژێکرنا وی ل سەر دخویانە، دێمێ وێ یێ مینا بەفرا سپی، ژ بەر قوتانێ یێ ڕەش و شین بووی.
ب دەنگەکێ ئارام گۆتێ:
-ل من ببۆرە.
-ئەڤە جارا چەندێ یە ل تە دبۆرم؟
ژینێ ب دەنگەکی تژی گرغ ژ هەڤژینێ خوە پرسی؟
-تو ئەگەرێ هندێی! دەمێ ئەز تە د هزرا دا دبینم، ل وی دەمی کەربا من زالبوونێ ل سەر من دکەت. ئەز باش دزانم ل وی دەمی تو هزرێن وی گاوری دکەی. لەو ئەز مێژکێ خوە ژ دەست دەم. من دڤێت بۆ من ب تنێ بی.
-تە باش دزانی دلێ من یێ دگەل کەسەکی دی. من ب ئاشکرایی ئەڤ چەندە گۆتبوو تە. تو ڕازی بووی من ب تنێ وەک جەستەیەکی دگەل خوە ببینی. من شیان نەبوون ئاخفتنا خێزانا خوە بشکێنم. لێ من ب ئاشکرایی دەردێ خوە بۆ تە گۆتبوو.
باوەری بەرێ خوە دا ئەسمانێ ساهی و ب دەنگەکی تژی کەرب و کین گۆت:
-من قەت باوەرنەدکر دێ هندە ب گرانی ل سەر من ڕاوەستت. هەر جارەکا هەستپێدکەم تو هزرێن ئێکێ دی دکەی، مێژکێ من نامینتە د سەرێ من دا.
دیسان پەنا برە بێدەنگیێ، بۆ دەربڕینێ ژ ئازارێن د ناخێ خوە دا، وی دزانی ئەو دودلی و گرژیا وی و ئەو هەموو بێدەنگیە و مانا ب تنێ، ئاماژێ ب دلەکێ شکەستی ددەن. وی ئەو هەموو پەشێمانی د چاڤێن وێ دا ددیت.
دەستێ خوە بۆ درێژکر و گۆتێ:
-ڕابە دا بچینە مال، سوزێ د دەمەتە ئەڤە دوماهی جار بت دەستێ خوە بۆ تە درێژبکەم.
ژینێ بێی دەستێ خوە بکەتە د دەستێ وی دا، ڕابوو سەر خوە. ب پێنگاڤێن هەڕفی ل دەوسا پینگاڤێن وی دا ڕێ.
