بەرنامەیێ رێكخستییا ئاوارە دبرنە شنگالێ هاتە راگرتن
لەزگین جوقی:
رێڤەبەرێ كۆچ و كۆچبەران ل پارێزگەها دهۆكێ دیاركر، ژبەر بریارەكا ئەمریكا كارێ رێكخراوا ئاوارە دبرنە شنگالێ هاتە راگرتن و گۆت: سەرۆكێ ئەمریكا دونالد ترامپ بریار دایە هاریكاریێن دارایی بۆ هەموو رێكخراوێن ئەمریكی بهێنە راگرتن.
پیر دەیان جەعفەر، رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ راگەهاند، بەرنامێ وێ رێكخراوا خەلكێ ئاوارە ژ كەمپان دبرنە شنگالێ ژ بەر بریارا سەرۆكێ ئەمریكا كارێ وان هاتە راگرتن و چەندین فەرمانبەرێن مە ژی چووینە مال، ژ بەر كو سەرۆكێ ئەمریكا دونالد ترامپ بریار دایە هاریكاریێن دارایی بۆ هەموو رێكخراوێن ئەمریكی بهێنە راوەستاندن، ئەڤە بوویە ئەگەر كارتێكرنەكا مەزن ل ئاوارە و پەنابەران بهێتەكرن.
عەلی شەمۆ ، چالاكڤانێ ئێزدی ل چیایێ شنگالێ دیار كر، ژبەر بریارەكا ئەمریكا زیانێن مەزن دێ گەهنە خەلكێ شنگالێ، هەموو رێكخراوێن گرێدایێ ئەمریكا دێ كارێن خۆ ل شنگالێ راگرن و شوول ناكەن و ئەڤە دێ زیانەكا مەزن گەهینتە لیقەوماوێن شنگالێ.
چالاكڤانێ قەزا شنگالێ راگەهاند، ئیدارا ئەمریكا بریار دایە رێكخراوێن وان كار نەكەن و كارێن خۆ راوەستینن كۆ چەندێن رێكخراوێن گرێدایێ ئەمریكا ل شنگالێ كار دكەن و هەڤكاری و پشتەڤانیا خەلكێ شنگالێ دكەن، ئەڤ رێكخراوە دێ هاریكاری و پشتەڤانین خۆ بۆ خەلكێ شنگالێ راوەستینن و دێ گەلەك زیان گەهتە خەلكێ دەڤەرا شنگالێ.
