بەرنامە هەنە مۆبایلێ بكەنە پرۆجێكتەر؟
تە جارەكێ هزرا خوە كریە كو ل جهێ ل سەر مۆبایلا خوە تەماشەیی ڤیدیۆیەكێ بكەیی، بێخیە دیوارەكی و ب رەنگەكێ مەزن وەكو شاشێن پرۆجێكەران یان سینەمایان تەماشە بكەیی، چو پێ نەڤێت دێ كارەكێ گەلەك خوەش بیت.
نها گەلەك ئەپ كەفتینە د بازاری دا و بانگەشەیا وێ چەندێ دكەن كو ئێدی ئەڤ بەرنامە دشێن جهێ پرۆجێكتەری بگرن و ب وی كاری راببن، بەلێ د راستی دا ئەو دشێن وی كاری بكەن؟
ل ڤێرە دێ بۆ هەوە دیار كەین كا ئایا چو بەرنامە هەنە دشێن ڤی كاری ئەنجام بدەن یان نە.
د راستی دا، چو بەرنامێن فری د ئەپل ستوری و ئەپل ئای دی ژی دا نینن ئانكو بۆ هەردو سیستەمێن ئەندرۆید و ئای ئو ئێس، كو بشێن ڤی كارێ ل خوارێ ئەنجام بدەن.
د ناڤا بەرنامێن ب پارە ژی دا، بەرنامێ ڤیدیۆ پرۆجێكتەر یێ هەیی كو ئەو بانگەشەیا وێ چەندێ دكەت كو ب رێیا فلاشێ مۆبایلێ ئەو دشێت وی كاری ئەنجام بدەت، بەلێ هێش ئەڤێ ئەپلیكەیشنێ ژی چو سەركەفتن نەئینایە و ب تنێ بانگەشەیە.
فلاشێ مۆبایلێ ب تنێ وەكو لێتەكی یە، چاوان دشیان دایە ئەو ڤی كاری بكەت و نەبوونا تشتەكێ وەسان د ستورێن فەرمی یێن سیستەمێن ئەندرۆید و ئای ئو ئێس ئەپلێن ژ ڤی رەنگی دئێخیتە بن گۆمانێ.
بۆ بكارئینانا مۆبایلێ وەكو پرۆجێكەر، تاك پێدڤی ب وەرگرەكی یان وایفای یا هەر تشتەكی ژی ڤی رەنگی هەیە كو نها دشیان دایە ب گەلەك رێیان مۆبایلا خوە ل گەل ئامیرێ تلەڤزیۆنێ گرێدەیی و د وێ رێ دا تەماشەی تشتێ تە بڤێت بكەیی.
هەر تشت دەربارەیی سامسۆنگ گالاكسی S24
ئەڤرۆ:
بڕیارە ل دەسپێكا سالا نوو 2024 كۆمپانیا مەزنا كوریا باشووری، سامسۆنگ، نفشەكێ نوو یێ مۆبایلێن خوە یێن زیرەنگ كو دهێنە هژمارتن ب هێزترین بەرهەمێن كۆمپانیا ناڤبری بێخیتە ناڤ بازاری كو پێك دهێن ژ سامسۆنگ گالاكسی S24 و سامسۆنگ گالاكسی S24 پلەس و سامسۆنگ گالاكسی S24 ئولترا. بەری ئەڤ بەرهەمە بكەڤنە د بازاری دا، هندەك تایبەتمەندیێن وان ب رێیا كەنالێن تایبەت دهێنە ئاشكەرا كرن و د ڤێ راپۆرتێ دا ب تێر و تەسەلی ئەو هەموو پێزانین هاتینە بەحسكرن.
كۆمپانیا سامسۆنگ ل سالا بۆری سامسۆنگ گالاكسی S23 ل كانوونا ئێكێ یا ئەڤ سالە خستە د بازاری دا، ژ بەر هندێ پێشبینی دهێتە كرن كو د هەمان مێژوویا سالا بهێت دا ئەو مۆبایل بهێتە نمایشكرن، چاڤدێر زێدەتر ل گەل هندێ نە كو ئەڤ مێژوویە 17ی كانوونا ئێكێ یا 2024ێ بیت.
ژ بەر كو دیزاین و كولێتیا Galaxy Z Flip5 و Galaxy Z Fold5 گەلەك هاتیە پێشئێخستن، هەمان پێبینی بۆ نڤشتێ نوو یێ زنجیرا سامسۆنگ ئێس ژی دهێتە كرن
وەكو مە بەحس لێ كری، ئەڤ نفشێ نوو پێك دهێن ژ سامسۆنگ گالاكسی S24 و سامسۆنگ گالاكسی S24 پلەس و سامسۆنگ گالاكسی S24 ئولترا، بولێ سامسۆنگ گالاكسی S24 ئولترا مۆبایلا هەرە باشتر و ناڤدارترە د ناڤ وان و خودانا شیانێن خوە یێن بێ سنورە هەر وەكو د زنجیرێن خوە یێن پێشتر ژی دا یا بێ هەڤرك بوو ب تایبەت وەكو ئەندرۆید.
دهێتە پێشبینیكرن بهایێ ڤان مۆبایلان یێ بلند بیت ب تایبەت پشتی راگەهاندی كو دێ تیتانیۆمی ژی د ناڤ مۆبایلێ دا زێدە كەن، ب گۆرەیی چاڤدێران دهێتە پێشبینی كرن كو 1100$ هەتا 1200$ بن ب گۆرەیی عەمبارێن وێ.
دهێتە پێشبینیكرن كو ژ لایێ دیزاینێ ڤە گەلەك گوهۆڕینێن بەرچاڤ نەبن، ب تایبەت ئێس 24 و ئێس 24 پلەس، بەلێ دێ یا ئولترایێ یا تایبەت بیت كو ئەو ب تنێ دێ پێنڤیس ل گەل بیت و چارەسەركارێ وێ دێ پتر بیت و كامیرا وێ ژی گەلەك باشتر هاتیە دروستكرن. یا راست ژی هێش دیار نەبوویە كا دێ چارەسەركارێ Qualcomm Snapdragon 8 Gen 3 یان ژی Samsung Exynos 2400 یێ نوو بكار ئینن.
تشتێ دی یێ هاتیە زانین ئەوە كو كار ل سەر بەرفرەهكرنا بارگەیا پاتریێ هاتیە كرن ب هەمان قەبارە و ئەڤە ژی ب تنێ سامسۆنگ دزانیت چاوان و دیسا بیت لەزاتیا بارگەكرنێ د ڤێ مۆبایلێ دا بگەهیتە 65 واتان.
د سەر ڤێ چەندێ را دبیت شاشێن نوو یێن ب كوالێتیا بلند Dynamic AMOLED 2X و دانەیەكا نوو ژ One UI ببینین و دێ پشت بەستنێ ل سەر سیستەمێ ئەندرۆید 14 و دبیت زێدەتر ژی بكەت.
هەكە بەحس ل هندێ هاتیە كرن كو پشتی ئەپل ژ نوو سامسۆنگ ژی دێ تیتانیۆمێ د مۆبایلێن خوە دا بكارئینیت و ئەڤە ژی لاسایی كرنا ئایفۆنێ یە، بەلێ د راستی دا ڤی بابەتی چو پەیوەندی ب ئایفۆنێ ژی ڤە نینە و نە لاسایی كرنە ژ بەر كو داهێنان نەیا ئایفۆنێ یە و گەلەك جاران سامسۆنگێ ژی پێنگاڤ هاڤێتینە و د دووڤدا ئایفۆنێ ژی هەمان پێنگاڤ هاڤێتینە و سەركەفتن ئیانینە.
ل دووماهیێ ژی ئەڤە هەموو ئەوە یا ژ ژێدەرێن نەفەرمی هاتیە ڤەگوهاستن و راستی و دروستیا هەموو ئەڤ بابەتێن مە بەحس كرن، جهێ گۆمانێ نە، هەتا د كەڤنە د بارزاری دا و ب چاڤ دهێنە دیتن.
