بەرهەمئینانا مریشكان ل هەرێما كوردستانێ گەهشتیە ئاستەكێ باش
هەولێر، قائید میرۆ
رێڤەبەرێ سامانێن ئاژەلی ل وەزارەتا چاندنێ دیار كر، هەرێما كوردستانێ پێشكەفتنێن بەرچاف ل بەرهەم ئینانا مریشكا بخۆڤە دیتینە و گۆت: حوكمەتا ئیراقێ ب بەهانەیێن جودا رێگریێ ل چوونا بەرهەمێ هەرێما كوردستانێ بۆ بازاڕێن ناڤەڕاست و باشوورێ ئیراقێ دكەت.
فیراز سدیق، رێڤەبەرێ سامانێن ئاژەلی ل وەزارەتا چاندنێ بۆ رۆژناما ئەڤرۆ دیار كر» بەرهەمێ مریشكێن هەرێما كوردستانێ گەهشتیە ئاستەكی، ژبلی پێدڤیێن ناڤخۆ بەرهەمێ زێدە هەیە بۆ دەرڤەی هەرێما كوردستانێ ژی بهێتە هنارتن، باشترین بازاڕ بۆ بەرهەمێ زێدە پارێزگەهێن باشوور و ناڤەڕاستا ئیراقێ یە، بەلێ مخابن هەر جارێ ب بەهانەیەكێ حوكمەتا ئیراقێ چوونا بەرهەمێ مریشكێن كوردستانێ بۆ دەڤەرێن بن دەستهەلاتا خۆ قەدەغە دكەت و رێگریێ ل هنارتنا ئەڤی بەرهەمی دكەت.
زێدەتر گۆت: ئەڤە د دەمەكی دایە ئیراقێ سالانە پێدڤی ب ئێك ملیۆن تەنێن گوشتێ مریشكێ هەیە و بەرهەمێ نافخۆیا ئیراقێ ژی تنێ 300 هزار تەنن سالانە، واتە هەر سال ئیراقێ پێدڤی ب 700 هزار تەنێن مریشكا هەیە هەتا پێدڤیێن بازاڕێ نافخۆ تژی بكەت، چەندین جاران مە دانوستاندن ئەنجامداینە دگەل حوكمەتا ئیراقێ و هەتا بەهانەیەكێ چارەسەر دكەین ئێكادی پەیدا دكەن.
ناڤبری خویاژی كر، جارەكێ گۆتی بلا پڕۆژەیێن هەرێما كوردستانێ بهێنە تۆماركرن، پشتی مە پڕۆژە تۆماركری دەست ب قەدەغەكرنا بەرهەمێ كارگەهێن چێكرنا ئالیكی كر، سەرۆك وەزیرێن هەرێما كوردستانێ ئاحفتنەك هەبوو دەمێ گۆتی ئەم یێ باجا پێشكەفتنا خۆ ددەین، دروست ئەڤە بۆ مە خۆیابوو، چونكە ئیراق دخوازیت ل ئابورا هەرێما كوردستانێ بدەت.
فیراز سدیق گۆت ژی» نوكە حوكمەتا ئیراقێ یا رازیە بەرهەمێ مریشكا ب قاچاغی بكەڤیتە بازاڕی، بەلێ یا بەرهەڤ نینە بەرهەمەكێ ساخلەم یێ پڕۆژەیێن هەرێما كوردستانێ بچیتە بازاڕێن ناڤەڕاست و باشوورێ ئیراقێ، چونكە حوكمەتا بەغدا دزانیت بەرهەمێ هەرێما كوردستانێ خواستەكا زۆر لسەر هەیە و ژلایێ ساخلەمی ڤە باشترە ل بەرهەمێ دەرڤەی ئیراقێ، هەتا خوارنگە هەبوویە ل بەغدا دەمێ ریكلام كری دبێژیت خوارنامە بەرهەمێ كێلگەهێن هەرێما كوردستانێ نە، ئەڤە ژی رامانا ڤێ ئێكێ ددەت خواست لسەر بەرهەمێ كوردستانێ هەیە، خەلكێ باشوور و ناڤەڕاستا ئیراقێ دگەل خەلكێ هەرێما كوردستانێ ژیایە و دزانن بەرهەمێ مریشكێن هەرێما كوردستانێ ب كوالێتیەكا باش دهێنە بەرهەم ئینان، ئەم یێ بزاڤان دكەین بەرهەمی مریكشا بۆ بازاڕێن دەرڤەژی بهنێرین، بەلێ نوكە كار لسەر ڤێ چەندێ دكەین رێكارێن هنارتنێ دێ چاوابن، ژبەركو مە ئاریشەیا ڤەگوهاستنێ هەیە و دخوازین ب بهایەكێ كێم بەرهەم بهێتە هنارتن بۆ بازاڕێن جیهانێ.
